Alma Dekovic
27 Јануари 2024•Ажурирај: 28 Јануари 2024
ИСТАНБУЛ (АА) - Директорот на Канцеларијата за комуникации на Претседателството на Туркије, Фахретин Алтун, се обрати на симпозиумот „Медиумска борба за вистината на војната во Газа“ на кој зборуваше за дезинформациите и цензурите што ги произведува Израел, пренесува Анадолу.
„Политиката на насилство, дезинформации и цензура што ја произведува Израел за да го сокрие, легитимизира и институционализира угнетувањето што со децении продолжува во Палестина и се продлабочува во Газа по 7 октомври, не му се заканува само на палестинскиот народ, туку и на целото човештво, на светскиот и на регионален мир. За да можат тие закани да се елиминираат, пред сѐ, мораат да бидат казнети воените злосторници и геноцидните потези на Израел“, истакна Алтун.
Потсетувајќи дека интензивно се работи на дешифрирање на содржината на дезинформации и лажни информации што ги произведува Израел, Алтун рече дека Израел со овие кампањи на дезинформации се обидува да ја прикрие вистината и да ја направи невидлива.
„Сакаме да ги откриеме и да ги прикажеме тие лаги, заедно со фактите, пред агендата на меѓународната заедница. Работиме на тоа. Во тој контекст, нашиот Центар за борба против дезинформации, кој делува во рамките на Канцеларијата за комуникации на турското претседателство, работи 24 часа. Вестите за израелските лаги што ги откривме се пренесуваат во медиумите ширум светот“, истакна Алтун.
Директорот за комуникации Алтун наведе дека интензивно работат под водство на претседателот на Турије, Реџеп Таип Ердоган, за да придонесат за оправданиот отпор на народот на Газа и да обезбедат нивниот глас посилно да одекне низ светот.
„Како членови на глобалната заедница на совеста, мораме повеќе на дневен ред да ја поставуваме ситуацијата во Газа, користејќи ги сите средства што ни се на располагање, и погласно да му кажуваме на светот дека Израел изврши воено злосторство. Како Туркије, ги вложуваме сите напори во тој поглед и подготвени сме за повеќе“, напомена Алтун.
Тој истакна дека Туркије во сите меѓународни кризи во кои досега била вклучена, дејствувала во соработка и координација со актерите на глобалната совест и му ја покажала важноста на тоа на целиот свет.
