Шесткратниот француски шампион Бордо прогласи банкрот

АНКАРА (АА) - Шесткратниот француски фудбалски шампион Бордо поднесе барање за банкрот, потврди клубот, јавува Анадолу.

„По потврдата на одлуката на Националната дирекција за контрола на управувањето (DNCG) да го исфрли ФК Жирондинс де Бордо во (третолигашката) лига Национал 1, клубот поднесе барање за банкрот до Трговскиот суд на Бордо во вторникот, со цел да го започне неопходното реструктурирање“, се вели во соопштението на Бордо.

Бордо, кој последен пат ја освои највисоката француска Лига 1 во 2009 година, истакна дека тие мора да се откажат од својот професионален статус со цел да избегнат „дополнителни тешки санкции“.

Националната дирекција за контрола на управувањето (DNCG) е финансиски надзорник на францускиот фудбал кој ги следи сметките на француските професионални клубови.

„Иако тренинг-центарот како резултат на тоа ќе се затвори, клубот ќе продолжи да ги промовира младинските тимови“, соопшти Бордо.

Клубот не успеа да влезе во Лига 1 две години, бидејќи претходно во 2022 година беше исфрлен во Лига 2.

Во јули, Групацијата Фенвеј спортс (FSG), американски конгломерат сопственик на гигантот од англиската премиер лига Ливерпул, се повлече од преговорите за преземање и купување на Бордо.

Бордо, кој се здоби со професионален статус во 1937 година, е еден од клубовите каде играа многу познати фудбалски ѕвезди како што се поранешните француски играчи Зинедин Зидан, Кристоф Дугари, Биксант Лизаразу и Силвен Вилтор, како и поранешниот португалски напаѓач Паулета.

Репрезентативците на Франција, Орелиен Чоамени (Реал Мадрид) и Жил Кунде (Барселона) беа последните „вредни продукти“ на Бордо.