Јеменските Хуси споделија снимка од американско беспилотно летало што го собориле во Мариб

МАРИБ (АА) – Движењето на јеменските Хуси, поддржано од Иран, синоќа објави дека собориле американско борбено беспилотно летало „MQ-9 Reaper“ во гувернерството Мариб, објавувајќи снимка од остатоците. Хусите наведоа дека дронот бил погоден со проектил земја-воздух од локално производство додека вршел „непријателски операции“ во јеменскиот воздушен простор, јавува Анадолу.

Претходно, Хусите соопштија дека американските воени авиони неодамна извршиле 22 напади во северните провинции Сана и Саада.

Телевизијата „Ал Масира“, управувана од Хусите, јави дека американските воени авиони ја нападнале областа Џарбан во Санхан, југоисточна Сана, в зори со пет воздушни напади и областа Бани Матар во западна Сана, со два напада.

Телевизијата додаде дека провинцијата Саада, клучното упориште на Хусите, била под 15 напади на САД во раните утрински часови вчера.

Според Хусите, САД ги интензивираат воздушните напади врз областите под контрола на Хусите во Јемен во последните денови со невидена брзина, при што има жртви и материјална штета.

Трамп на 15 март рече дека наредил „одлучна и моќна воена акција“ против Хусите, а подоцна се закани дека „целосно ќе ги уништи“.

Хусите ги гаѓаат бродовите во Црвеното Море и Аденскиот Залив од ноември 2023 година во знак на солидарност со Палестинците во Појасот Газа, каде што Израел уби над 50.300 луѓе.​​​​​​​

Кампањата на воздушни напади започна откако Хусите се заканија дека повторно ќе нишанат бродови затоа што Израел ја блокира хуманитарната помош за Газа.