Шефот на УНРВА ги негираше израелските тврдења за сопственост врз комплекс во Источен Ерусалим

ИСТАНБУЛ - Шефот на Агенцијата на ОН за палестински бегалци вчера ги негираше израелските тврдења за сопственост врз комплексот Шеик Џара во окупираниот Источен Ерусалим, велејќи дека Израел нема законски права врз локацијата, јавува Анадолу.

Филип Лазарини, генерален комесар на Агенцијата на ОН за помош и работа за палестинските бегалци, во објава на американската платформа на социјалните медиуми X изјави дека израелската Влада не го поседува ниту има права врз комплексот, негирајќи го она што тој го нарече „лажни и нелегитимни“ тврдења.

„УНРВА го изнајмува земјиштето од јорданската Влада од 1952 година и 'никогаш не се случил никаков пренос на сопственост'“, рече Лазарини, додавајќи дека сегашниот потег претставува незаконска заплена.

Тој рече дека Меѓународниот суд на правдата и Генералното собрание на ОН утврдиле дека присуството на Израел во Источен Ерусалим е нелегално и „мора да заврши што е можно побрзо“.

„Израел нема суверени права во окупираната палестинска територија и примената на неговите закони таму е незаконска“, додаде Лазарини.

Минатиот месец, израелскиот Кнесет донесе закон за прекин на снабдувањето со електрична енергија и вода во просториите на УНРВА во Источен Ерусалим.

Израел претходно презеде слични чекори против агенцијата. Во 2024 година, Кнесетот донесе закон со кој се забрануваат активностите на УНРВА во Израел, наведувајќи ги тврдењата дека некои вработени на УНРВА биле вклучени во настаните од октомври 2023 година.

Агенцијата ги негираше тврдењата, а ОН соопштија дека УНРВА се придржува до строгите стандарди за неутралност.