ИСТАНБУЛ (АА) – Челникот на Обединетите нации (ОН) за човекови права, Фолкер Турк, денес изјави дека смртоносниот напад врз основното училиште во Иран „предизвика длабок ужас“, повикувајќи ги сите земји да преземат итни чекори за заштита на учениците и цивилите во вакви конфликти, јавува Анадолу.

„Бомбардирањето на основното училиште за девојчиња 'Шаџаре Тајебе', во Минаб, предизвика длабок ужас“, изјави Турк, мислејќи на воздушниот напад на 28 февруари, првиот ден од актуелниот конфликт, за кој аналитичарите на Министерството за одбрана на САД рекоа дека најверојатно е резултат на американски напад. Во нападот загинаа околу 170 луѓе, повеќето ученички.

„Сцените од бомбардираните училници и родителите скршени од болка, јасно покажаа кој ја плаќа највисоката цена на војната, цивилите што немаат никаква моќ во донесувањето на одлуките што доведоа до конфликтот“, изјави тој на почетокот на итната дебата во Советот за човекови права на ОН.

Турк нагласи дека „какви и да се несогласувањата меѓу земјите, сите може да се согласиме дека тие нема да бидат решени со убивање ученици“, потенцирајќи ја потребата за почитување на меѓународното хуманитарно право.

„Ги повикувам сите земји да преземат итни чекори за заштита на образовните установи и на сите што учат и работат во нив“, изјави тој.

Предупредувајќи на проширувањето на конфликтот, Турк изјави: „Воената ескалација на Блискиот Исток и во Персискиот Залив достигнува опасни нивоа. Таа мора да се сопре. Постои висок и растечки ризик од натамошно ширење на конфликтот и зголемено страдање на цивилите во директно вклучените земји, но и надвор од регионот.“

„Ги повикувам Соединетите Американски Држави и Израел да ги прекинат своите напади врз Иран, а го повикувам Иран да престане да ги напаѓа своите соседи и да ги почитува и заштитува човековите права на сопствениот народ“, додаде тој.

Повикувајќи на воздржаност, тој изјави: „Ги повикувам сите држави како приоритет да го постават спречувањето на натамошните страдања, заштитата на сите цивили, без оглед на нивната националност или локација, и стремежот кон долгорочен одржлив мир.“

Тој дополнително предупреди за продолжувањето на воената ескалација, велејќи: „Бомбите и ракетите не се пат кон одржлив мир. Тие носат само смрт, уништување и беда.“