Шефот за човекови права на ОН повика на итен прекин на непријателствата во Судан и враќање на разговорите

ЖЕНЕВА (АА) - Шефот за човекови права на ОН, Волкер Турк, денес повика на итен прекин на непријателствата во Судан и ги повика завојуваните воени и паравоени сили да се вратат на преговарачката маса, јавува Анадолу.

„Судан веќе претрпе толку многу болка и страдање. Борбите се раѓаат од игри на моќ и лични интереси кои служат само за отуѓување на демократските аспирации на населението“, изјави Турк.

„Дали одговорните не разбираат дека цивилното население сега само копнее за мирен живот?“, запраша Турк.

Истакнувајќи дека голем дел од насилството се случило во густо населените региони на главниот град Картум, како и во станбените области на градовите низ целата земја, тој рече дека воздушните напади и артилериското гранатирање ги довеле цивилите во опасност.

„Илјадници цивили се заробени во своите домови, штитејќи се од борбите, без струја, не можат да излезат надвор и загрижени се дека ќе останат без храна, вода за пиење и лекови“, изјави Турк, додавајќи дека двете страни мора да ги потсетуваат своите борци на нивните обврски според меѓународното право да обезбедат заштита на цивилите и цивилната инфраструктура.

Велејќи дека е особено ужаснат од извештаите за обид за силување, шефот за човекови права побара брза, темелна и непристрасна истрага за убиствата на цивили, вклучително и на тројца вработени во Светската програма за храна, како и за други пријавени прекршувања.

„Само пред неколку недели, Судан се чинеше дека е на вистинскиот пат кон договор кој ќе го врати цивилното владеење“, рече тој.

„Мора да надвладее здравиот разум и сите страни мора да дејствуваат за да ги намалат тензиите. Заедничките интереси на суданскиот народ мора да бидат на прво место.“

Исто така, директорот на Информативните служби на ОН на двонеделниот брифинг на ОН, денес, по прашањето на новинарот на Анадолу, рече дека за да се запре борбата е потребен „координиран напор на меѓународната заедница“.

Алесандра Велучи истакна дека генералниот секретар на ОН, Антонио Гутереш, од почетокот на конфликтот направил „многу силна и интензивна дипломатска активност“, при што веднаш разговарал со лидерите на двете страни, како и со шефот на Африканската унија.

„Ги повикавме двете страни да го прекинат огнот и да се вратат на преговарачка маса“, рече од своја страна Сеиф Маганго, портпарол на Високиот комесаријат за човекови права на ОН, и додаде дека „нема подобра опција“ од решавање на проблемот.

Во саботата во главниот град Картум и неговата околина избија борби меѓу суданската Армија и паравоените сили за брза поддршка.

Оттогаш најмалку 185 луѓе се убиени, а 1.800 се повредени во вооружените судири меѓу воените ривали, според ОХХР.