Член на одборот на „Би-би-си“ поднесе оставка поради „проблеми со управувањето“

ИСТАНБУЛ (АА) - „Би-би-си“ денес објави дека еден од членовите на одборот, Шумет Банерџи, ја потврдил својата оставка поради „проблеми со управувањето“ во врвот на корпорацијата, известува Анадолу.

Банерџи во писмо објаснува дека „не бил консултиран“ за настаните што довеле до заминувањата на генералниот директор, Тим Дејви, и извршната директорка на „Би-би-си њуз“, Дебора Тернес.

Се вели дека е зголемена загриженоста околу управувањето со одборот на „Би-би-си“, кој е одговорен за надзор и стратегија на корпорацијата, при што Банерџи директно ги критикувал претседателот Самир Шах и другите членови.

Оставката на Банерџи следуваше по оставката на Дејви и Тернес на почетокот на ноември, поради обвинувањата дека говорот на американскиот претседател Доналд Трамп во документарецот емитуван минатата година од страна на овој радиодифузер бил монтиран за гледачите да бидат доведени во заблуда.

Оставката дојде откако „Телеграф“ неодамна објави протечена интерна белешка на „Би-би-си“ во која се сугерира дека програмата „Панорама“, која беше емитувана една недела пред претседателските избори во 2024 година, ги монтирала двата дела од говорот на Трамп заедно, така што тој изгледа дека експлицитно ги охрабрува немирите на Капитол Хил од јануари 2021 година.

Трамп оттогаш ја повторува својата закана дека ќе започне правна постапка со вредност од 1 милијарда долари против „Би-би-си“, и покрај извинувањето од јавниот радиодифузен сервис. Зборувајќи во интервју за „Фокс њуз“, тој рече:

„Мислам дека имам обврска да го направам тоа, не можете да им дозволите на луѓето да го прават тоа. Претпоставувам дека морам. Тие ја измамија јавноста и го признаа тоа. Ова е кај еден од нашите големи сојузници, наводно наш голем сојузник“.