Часовникот на Судниот ден поместен на 85 секунди до полноќ

ИСТАНБУЛ (АА) – Часовникот на Судниот ден вчера беше поместен на 85 секунди до полноќ, што претставува најблиска точка до глобална катастрофа од неговото основање во 1947 година, објави „Си-би-ес њуз“, пренесува Анадолу.

Часовникот го одржува „Билтенот на научници за атомска енергија“, кој како главни причини за оваа одлука ги наведува зголемените нуклеарни закани, забрзаните климатски промени и брзиот технолошки развој.

„Човештвото не постигна доволно напредок во справувањето со егзистенцијалните ризици што нè загрозуваат сите“, изјави Александра Бел, претседателка и извршна директорка на „Билтенот на научници за атомска енергија“.

Претседателот на Одборот за наука и безбедност на Билтенот и професор по физика на Универзитетот во Чикаго, Даниел Холц, предупреди дека климатските влијанија се интензивираат на глобално ниво.

„Сушите, пожарите, поплавите и бурите продолжуваат да се интензивираат и да стануваат понепредвидливи, а ова само ќе се влошува“, рече Холц.

Часовникот на Судниот ден е создаден по Втората светска војна, по употребата на атомските бомби, со цел да ги предупреди јавноста и креаторите на политики на заканите по опстанокот на човештвото.

Последните години стрелките на часовникот постојано се приближуваат до полноќ бидејќи научниците предупредуваат дека политичките лидери не преземаат доволно мерки за да ги намалат растечките ризици.