ИСТАНБУЛ (АА) - Палестинската група Хамас денес соопшти дека вечерва ќе ги предаде останките на двајца израелски заложници во согласност со договорот за прекин на огнот, пренесува Анадолу.

Во соопштението објавено на Телеграм, вооруженото крило на групата, Бригадите Ал-Касам, наведе дека предавањето ќе се изврши во 16 часот по локално време.

Израелскиот јавен сервис КАН претходно објави дека се вршат подготовки за прием на телата од страна на израелските власти во текот на следните часови.

Планираното предавање доаѓа само два дена по воздушните напади на Израел во кои беа убиени повеќе од 100 Палестинци низ Појасот Газа, иако е на сила прекинот на огнот.

Тел Авив тврдеше дека нападите се случиле по вооружен инцидент во кој бил убиен израелски војник во Рафа, но Хамас го негираше учеството во нападот и ја потврди својата посветеност на договорот за прекин на огнот.

Досега Хамас има ослободено 20 израелски живи заложници и ги предал посмртните останки на 17 од вкупно 28 заробени лица, повеќето Израелци, во првата фаза од примирјето. Израел, сепак, тврдеше дека едно од телата не е на негов државјанин.

Прекинот на огнот стапи на сила на 10 октомври, во рамките на планот од 20 точки на американскиот претседател Доналд Трамп.

Првата фаза од договорот вклучува ослободување на израелските заложници во замена за речиси 2.000 палестински затвореници. Планот, исто така, предвидува обнова на Газа и воспоставување нов управувачки механизам без Хамас.

Израел уби повеќе од 68.500 Палестинци, повеќето жени и деца, а повреди над 170.000 во нападите врз Појасот Газа од октомври 2023 година.