Şeyma Uzundere
08 Јануари 2024•Ажурирај: 09 Јануари 2024
ПАРИЗ (АА) - Над 44.000 потписи се собрани против законот предложен од републиканските сенатори во Франција за криминализирање на антиционизмот, јавува Анадолу.
Од 3 ноември, 44.405 луѓе учествуваа во кампањата за потпишување што ја започна Колективот на адвокати за почитување на меѓународните обврски на Франција (CJRF) со цел да се реагира на Предлог-законот за криминализирање на антиционизмот.
Во петицијата се посочува дека со Предлог-законот што е изнесен пред Сенатот ќе се спречи „искажување на злосторствата извршени од Израел во смисла на меѓународното право“.
„Јасно е дека Предлог-законот носи сериозни ризици во однос на основните слободи“, се наведува во петицијата.
Во израелските напади врз Појасот Газа од 7 октомври загинаа 22.835 Палестинци, меѓу кои најмалку 10.000 деца и 7.000 жени. Додека според извештаите илјадници загинале под урнатините, цивилната инфраструктура се уништува со напади на болници и образовни установи каде што луѓето се засолнуваат.
Обединетите нации (ОН) и меѓународните хуманитарни организации тврдат дека Израел извршил воени злосторства во Газа.
Сенаторот Стефан Ле Рудулие од Републиканската партија рече дека израелски знамиња биле запалени на демонстрациите за поддршка на Палестина.
Под водство на Ле Рудулие, 16 сенатори во Предлог-законот што го доставија до Сенатот бараа оние кои го доведуваат во прашање постоењето на државата Израел да бидат осудени на една година затвор и 45.000 евра парична казна, а оние кои кажуваат навреди за Израел на две години затвор и парична казна од 75.000 евра.
За поттикнување омраза и насилство против Израел, законот предвидува пет години затвор и парична казна од 100.000 евра.
Одобрувањето на француското Национално собрание на законот со кој се изедначува антисемитизмот со антиционизмот во 2019 година, предизвика контроверзии.
Додека голем дел од научниците и академската фела ја истакнаа важноста на борбата против антисемитизмот, тие го споделуваат мислењето дека антиционизмот е легитимен.
