Тројца Палестинци загинаа, осуммина се повредени во рација на израелските војници на Западниот Брег

РАМАЛА (АА) - Тројца Палестинци загинаа, а осуммина се повредени во рација на израелските сили во градот Џенин на окупираниот Западен Брег, пренесува Агенција Анадолија (АА).

Во писменото соопштение на Министерството за здравство на Палестина се нагласува: „Тројца Палестинци загинаа, а осуммина се повредени од куршумите на израелските војници во градот Џенин.“

Според веста на палестинската државна телевизија, утврдено е дека загинатите Палестинци се Бера Лехлух, Лејс Ебу Сурур и Јусуф Салах.

Очевидци истакнаа дека израелските војници упаднале во градот Џенин и отвориле оган врз возило во кое имало четворица Палестинци.

По инцидентот избија судири меѓу израелски војници и десетици Палестинци. Израелските војници интервенираа користејќи вистински куршуми и солзавец.

Израелските официјални власти сѐ уште не издадоа соопштение во врска со настаните.