Тропски циклон ја погоди Индонезија, најмалку 20 загинати

ЏАКАРТА (АА) - Најмалку дваесет лица го загубија животот во поплавите и свлечиштата предизвикани од циклонот Далија кој ја погоди Индонезија, пренесува Anadolu Agency (AA).

Националната агенција за управување со катастрофи (БНПБ) соопшти дека најмалку 20 лица смртно настрадале во поплавите и свлечиштата предизвикани од циклонот Далија, кој ја погоди провинцијата Источна Јава.

Од БНПБ велат дека пет лица во регионот се водат за исчезнати, и дека продолжуваат спасувачките операции.

Според соопштеното, околу 2.000 куќи се оштетени, а надлежните упатуваат предупредување до населението во регионите кои сѐ уште не се погодени од циклонот, за можни поплави и свлечишта.

Во четвртокот беше соопштено дека 27 лица загинале како резултат на свлечишта предизвикани од циклонот Чемпака во Средна Јава.