ВАШИНГТОН (АА) – Американскиот претседател Доналд Трамп предложи откажување на прекинот на огнот помеѓу Израел и Хамас во Газа доколку сите заложници во Појасот Газа не бидат ослободени до сабота напладне, јавува Анадолу.
„Што се однесува до мене, ако сите заложници не бидат ослободени до сабота во 12 часот – мислам дека тоа е соодветно време – би рекол, укинете го прекинот на огнот и нека избие пекол. Би рекол дека мора да бидат ослободени до сабота напладне“, рече Трамп пред новинарите во Овалната соба.
Трамп изјави дека мисли оти голем дел од заложниците се „мртви“.
„Сабота во 12 часот ги сакаме сите назад. Зборувам во свое име. Израел може да го смени тоа, но јас велам сабота во 12 часот и, ако не се тука, ќе избие пекол“, предупреди тој.
Одговарајќи на прашање за американски заложник што сѐ уште се наоѓа во Газа, Трамп рече дека е време сите да бидат ослободени.
„Врз основа на тоа што го видов последниве два дена, мислам дека нема да преживеат долго. Сабота во 12 часот, а потоа ќе биде сосема различна ситуација“, рече тој.
На прашањето дали со тоа „ќе избие пекол“ мисли на израелски одговор, Tрамп продолжи со зборовите: „Ќе видите, а и тие ќе видат. Хамас ќе види што мислам… Тие се болни луѓе и ќе дознаат што мислам во сабота во 12 часот.“
На прашањето дали може да исклучи американска вмешаност по саботниот рок, претседателот на САД рече: „Ќе видиме што ќе се случи.“
Трамп, исто така, изјави дека ќе ја разгледа можноста за укинување на помошта за Јордан и Египет ако не прифатат преселување на Палестинците од Газа.
„Да, можеби. Зошто не? Ако не го сторат тоа, би можел да ја укинам помошта“, рече тој.
Запрашан како ќе го убеди јорданскиот крал да прими повеќе Палестинци, Трамп рече: „Мислам дека ќе прими, а мислам дека ќе прифатат и другите земји. Тие имаат добри срца.“
Се очекува Трамп да се сретне со јорданскиот крал Абдула Втори денес во Вашингтон, наспроти зголемените регионални тензии, особено околу предлогот на претседателот за преселување на палестинското население во Јордан и Египет, што наиде на остра критика.
- Газа е „пеколно место во моментот“
„Разговаравме со многу Палестинци. Тие би сакале да ја напуштат Газа ако можат да најдат место каде што ќе бидат. И разговарав со различни лидери од регионот и мислам дека беа многу позитивни за можноста да обезбедат земја… и ако може да изградиме убаво место за луѓето да живеат безбедно, сите во Газа би го направиле тоа“, рече Трамп.
„Тие беа прогонувани. Ги плукаа, ги третираа како ѓубре. И тие би сакале да излезат од Газа. Но досега никогаш немале алтернатива. Сега имаат алтернатива. А што се однесува до Хамас, вие го гледате вистинскиот Хамас“, рече Трамп.
Тој додаде дека Палестинците ќе ја напуштат Газа кога ќе имаат „убаво и безбедно место за живеење“.
Трамп рече дека моментно Газа е пеколно место.
Осврнувајќи се на окупираниот Западен Брег, Трамп рече дека „нема планови“ да ги премести.
„Во моментов тие се таму и претпоставувам дека сакаат да останат таму. Тоа е поинаку. Тие се таму. Никогаш не било како она за што зборуваме за Појасот Газа“, додаде тој.
Палестинската група Хамас во понеделникот објави дека целосно ги исполнила своите обврски од договорот за прекин на огнот, но го обвини Израел дека прекршил четири клучни одредби.
Претходно истиот ден вооруженото крило на Хамас, Бригадите Ал-Касам, објави дека го одложиле следното ослободување заложници додека Израел не ги исполни сите услови од договорот.
Договорот за прекин на огнот во три фази стапи на сила во Газа на 19 јануари, со што се запре геноцидната војна во Израел, во која се убиени повеќе од 48.000 луѓе и ја остави енклавата во урнатини.
Во првата фаза од прекинот на огнот, која трае до почетокот на март, треба да бидат ослободени 33 израелски заложници во замена за голем број палестински затвореници. Шестата размена меѓу Израел и Хамас беше закажана за оваа недела.
Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата за неговата војна против енклавата.
