Elena Trenchevska Chekovikj
09 Април 2025•Ажурирај: 10 Април 2025
Словенија останува силен поддржувач на Северна Македонија на нејзиниот евроинтеграциски пат, порача денес претседателката на Државниот збор на Република Словенија, Уршка Клакочар-Зупанчич, по средбата со претседателот на Собранието на Северна Македонија, Африм Гаши, пренесува Анадолу.
Гаши денес во Скопје ги пречека претседателката на словенечкото Собрание и придружната делегација со високи државни почести, а по средбата беше одржана и заедничка прес-конференција.
„Сакам да потенцирам дека Словенија е континуиран и ангажиран поддржувач на Северна Македонија на патот кон ЕУ и понатаму ќе ги нуди своите искуства и поддршка. Парламентот на Република Словенија секогаш е подготвен за размена на искуства и вредности на ниво на парламенти и стручни служби и пратеници, а сето тоа придонесува кон поефикасно работење на македонското Собрание во период на влегување на патот кон Европската Унија. Се радувам на времето и денот кога ќе може да ја поздравиме Северна Македонија како рамноправна членка на ЕУ“, рече Зупчанин.
Таа нагласи дека што побрзо треба да се случи влегувањето на земјите од Западен Балкан во ЕУ:
„Лично мислам дека тоа не би требало да биде толку далеку бидејќи влегувањето на државите од Западен Балкан веќе не смее да биде прашање ако, дали и кога. Тоа мора да се случи брзо. Посакувам одлуките, решенијата да дојдат што побргу за Република Македонија.“
Соговорниците разменија мислења и за клучните аспекти на билатералните односи и разговараа за можностите за зајакнување на врските меѓу двата парламента.
Од своја страна, пак, претседателот на Собранието на Северна Македонија, Гаши, ѝ се заблагодари на Словенија која, како што рече, е цврст поддржувач на аспирациите на земјата за интеграција во ЕУ.
„Политичкиот придонес, како и техничката поддршка на Словенија во зајакнувањето на административните капацитети за усогласување на нашето законодавство со тоа на ЕУ, ја потврди успешната соработката меѓу нашите институции и искрената подготвеност на Словенија за проширување на ЕУ со земјите од Западен Балкан“, рече Гаши.
Тој истакна дека како две држави посветени на вредностите на мирот, безбедноста и демократијата, заедничката заложба во рамките на НАТО и меѓународните организации го прави партнерството уште повеќе доверливо.
„По оваа посета можам со сигурност да изјавам дека Северна Македонија може да смета на Словенија, не само како сојузник во НАТО и поддржувач на интеграциите туку и како вистински пријател што гради односи врз основа на почит, разбирање и солидарност“, заклучи Гаши.
