Сирискиот министер за надворешни работи во Јордан на разговори за билатералната соработка

АНКАРА (АА) - Сирискиот министер за надворешни работи, Асад ал-Шаибани, денес пристигна во Аман во своја прва посета на Јордан по минатомесечниот пад на режимот на Башар ал-Асад, пренесува Анадолу.

Шаибани е придружуван од министерот за одбрана Мурхаф Абу Касра и шефот на разузнавањето Анас Хатаб на разговорите за хоризонтите на соработка меѓу двете земји, објави сириската државна новинска агенција САНА.

Во обраќањето на прес-конференцијата по разговорите со јорданскиот министер за надворешни работи Ајман Сафади, Шаибани рече дека новата ситуација во Сирија ставила крај на заканите со кои претходно се соочуваше Јордан“.

„Режимот на Асад зад себе остави проблеми со својот народ и соседните земји“, рече тој.

„Ќе го избришеме ова од меморијата на Сиријците и соседните држави“.

Шефот на сириската дипломатија рече дека надворешната политика на Сирија ќе се трансформира, нагласувајќи дека режимот на Асад „користел уцени и закани како алатки за преговори“.

„Одлучивме да формираме проширен подготвителен комитет за национален дијалог за да обезбедиме сеопфатна застапеност на сирискиот народ“, додаде тој.

Шаибани рече дека и покрај падот на режимот на Асад, санкциите продолжуваат да го таргетираат сирискиот народ, што го попречува закрепнувањето на земјата.

Вчера, американското Министерство за финансии објави шестмесечно олеснување на санкциите кон Сирија за да се олесни продолжувањето на основните услуги во земјата.

Шаибани рече дека одлуката на САД претставува 'пробив'.

„Но, ние го чекаме целосното укинување на санкциите“, нагласи тој.

Сафади, од своја страна, рече дека новата администрација на Сирија носи тежок товар.

„Мораме да им помогнеме во нивната мисија“, рече тој.

„Новата администрација се соочува со значителни предизвици и треба да ѝ се даде време да ги реши.

Шефот на јорданската дипломатија ја повтори подготвеноста на неговата земја веднаш да обезбеди електрична енергија за Сирија.

„Јордан ќе остане поддржувач на Сирија и ќе ја понуди сета можна помош за сирискиот народ“, рече тој.

„Стабилноста на Сирија е фактор на стабилност за Јордан“, рече тој, додавајќи дека ќе се формираат заеднички комитети со сириската страна за решавање на безбедносните, енергетските и другите прашања.

Сафади на 23 декември престојуваше во Дамаск каде што се сретна со Ахмед ал-Шара, лидерот на новата сириска администрација.

Во соопштението на јорданското Министерство за надворешни работи по посетата на Сафади беше објавено дека обновата на Сирија е од стратешко значење и за Јордан и за поширокиот регион.

Шаибани досега ги посети Саудиска Арабија, Катар и Обединетите Арапски Емирати по падот на Асад.

Башар ал-Асад, лидер на Сирија речиси 25 години, побегна во Русија откако антирежимските групи ја презедоа контролата врз Дамаск на 8 декември, ставајќи крај на деценискиот режим на партијата Баас.

Преземањето дојде откако борците на Хајат Тахрир ал-Шам ги освоија клучните градови во молскавична офанзива која траеше помалку од две недели.

Новата администрација на Сирија сега е предводена од Ал-Шара.