Rabia İclal Turan
19 Јули 2023•Ажурирај: 24 Јули 2023
ВАШИНГТОН (АА) - Претставничкиот дом на американскиот Конгрес вчера со големо мнозинство усвои Резолуција во која се наведува дека Израел не е „расистичка држава“, пренесува Анадолу.
Резолуцијата беше усвоена со 412 гласа „за“ и девет „против“. Против беа претставниците Рашида Тлаиб, Александрија Окасио-Кортез, Илхан Омар, Џамал Бауман, Самер Ли, Кори Буш, Ајана Пресли, Андре Карсон и Делија Рамирез.
Резолуцијата, претставена од републиканецот од Тексас, Аугуст Пфлугер, вели дека „државата Израел не е расистичка или апартхејдна држава“ и ги отфрла „сите форми на антисемитизам и ксенофобија и дека САД секогаш ќе бидат постојан партнер и поддржувач на Израел“.
Гласањето за Резолуцијата е извршено неколку дена откако демократската пратеничка Прамила Џајапал, која се противи на политиката на израелскиот премиер Бенјамин Нетанјаху, го критикуваше Израел во обраќањето на пропалестинските демонстранти во Чикаго во саботата.
„Еј, луѓе, може ли да кажам нешто? Може ли да кажам нешто како некој што бил на улица и учествувал на многу демонстрации? Сакам да знаете дека се боревме за да стане јасно дека Израел е расистичка држава, дека палестинскиот народ заслужува самоопределување и автономија, дека сонот за решение за две држави ни се оддалечува, дури не ни изгледа возможно“, рече Џајапал, чии коментари предизвикаа критики на социјалните мрежи.
Усвојувањето на Резолуцијата следуваше неколку часа по средбата на американскиот претседател Џо Бајден со неговиот израелски колега Исак Херцог во Белата куќа. Херцог, кој пристигна во Вашингтон во вторник, ќе се обрати во Конгресот утринава.
Говорот ќе биде бојкотиран од прогресивните демократи, вклучително и истакнатите пратеници Тлаиб, првата палестинско американска пратеничка во Конгресот, Окасио-Кортез и Омар. Одлуката за бојкот на обраќањето на израелскиот претседател доаѓа во време на растечки несогласувања меѓу демократите околу одржувањето на непоколебливата поддршка на САД за Израел.
