Претседателот на Чешка предупредува дека руската агресија поттикнува глобално кршење на човековите права

КОПЕНХАГЕН (АА) - Чешкиот претседател Петр Павел денес предупреди дека руската агресија во Украина предизвика зголемување на глобалните кршења на човековите права со охрабрување на режимите што ги игнорираат меѓународните норми, известува Анадолу.

„Руската агресија врз Украина поттикна зголемување на кршењето на човековите права во други земји и ги инспирираше оние што ги игнорираат меѓународните норми“, изјави претседателот Павел на годишната конференција „Форум 2000“ во Прага, пренесе „Радио Прага Интернационал“.

Тој ги наведе земјите како Северна Кореја, Иран, Нигер и Венецуела дека се примери на земји што дипломатски ѝ се придружиле на Москва како одговор на нејзините акции во Украина.

Претседателот Павел ги повика големите глобални сили, особено Кина, да го искористат своето влијание за промовирање на мирот и соработката. Тој го повика Пекинг да ги почитува човековите права и да покаже воздржаност во Тајванскиот Теснец, регион што сѐ повеќе е подложен на тензии околу суверенитетот и меѓународната динамика на моќ.

Конференцијата „Форум 2000“, основана од поранешниот чешки претседател Вацлав Хавел, служи како платформа за глобалните лидери и интелектуалци да разговараат за итни прашања поврзани со демократијата, човековите права и граѓанското општество.