Полскиот премиер со критики до ЕУ: „Дали навистина беше потребно да се чека масакрот во Буча?“

ВАРШАВА

Повикувајќи се на масакрот во Буча, во близина на главниот град на Украина, Киев, полскиот премиер Матеуш Моравјецки силно ја критикуваше Европската комисија дека не направила повеќе за да ги спречи руските напади врз Украина, пренесува Агенција Анадолија (АА).

„Дали навистина беше потребно да се чека масакрот во Буча? Дали требаше да се чекаат сликите на невините убиени, кои ја открија руската бруталност?“, рече Матеуш Моравјецки во видеопорака, осврнувајќи се на телата на стотици цивили пронајдени откако Русија ги повлече своите трупи.

Повикувајќи ја Комисијата - извршната власт на ЕУ - да воведе построги санкции кон Русија, тој рече дека ЕУ дури и доцнела со воведувањето на своето прво официјално ембарго на рускиот енергетски сектор.

Војната на Русија против Украина, која започна на 24 февруари, предизвика меѓународен гнев, при што Европската Унија, САД и Велика Британија, меѓу другите, воведоа строги финансиски санкции кон Москва.

Досега, според податоците на ОН, во Украина загинале најмалку 1.480 цивили, а 2.195 се повредени, но се стравува дека вистинската бројка е многу поголема.

Според Агенцијата за бегалци на ОН, повеќе од 4,24 милиони Украинци побегнале во други земји, со уште милиони внатрешно раселени.