Панама го негира тврдењето на американскиот претседател Трамп дека може да го врати назад Каналот

ПАНАМА (АА) - Панама реагираше до ОН за изјавата на американскиот претседател Доналд Трамп дека САД можат да го вратат Панамскиот Канал, јавува Анадолу.

Панама вчера поднесе писмо до Обединетите нации, негирајќи го тврдењето на Трамп дека ја прекршиле спогодбата од 1999 година и ја предале контролата на Каналот на Кина.

Постојаниот претставник на Панама во ОН, Елој Алфаро де Алба, го цитираше правилото на Повелбата на ОН дека нациите „мора да се воздржат од закани или употреба на сила“ против „суверенитетот или територијалниот интегритет“ на друга држава.

Трамп, кој во понеделникот повторно ја презеде функцијата претседател на САД, ја повтори заканата дека ќе го врати Каналот, велејќи: „Ние не ѝ го дадовме на Кина. Ѝ го дадовме на Панама, и ќе си го земеме назад.“

Компанијата „Хачисон вампова“ од Хонгконг управува со две пристаништа близу Каналот, на атлантската и на пацифичката страна, но не и со самиот Канал.

Претседателот на Панама, Хозе Раул Мулино, целосно ги отфрли изјавите на Трамп, истакнувајќи дека нема присуство на која било држава во светот што се меша во нивната администрација.

Тој додаде: „Каналот е и ќе продолжи да биде на Панама“.

Писмото беше споделено со 15-члениот Совет за безбедност на ОН, наведувајќи дека изјавите на Трамп ја прекршуваат Повелбата на ОН.

САД го изградија Каналот и управуваа со околниот регион со децении. Во 1977 година беа потпишани договори со Панама за трансфер на целосната контрола, што беше завршено во 1999 година по заедничка администрација.

Договорот од 1999 година ја предаде целосната контрола на Каналот на Панама, обезбедувајќи нејзина неутралност и панамски суверенитет.