Палестинскиот амбасадор во Британија: Опресијата во Палестина не почна на 7 октомври, туку пред 106 години

ИСТАНБУЛ (АА) – Палестинскиот амбасадор во Велика Британија, Хусам Зомлот, рече дека опресијата на Израел во Палестина не е започната на 7 октомври, туку пред 106 години.

Во разговор за Анадолу на 7. ТРТ Ворлд форум во Истанбул, Зомлот рече: „Сѐ започна кога Британија им ги вети нашите територии на други, без да нѐ консултира, и нѐ претвори нас, палестинскиот народ, во нееврејско малцинство“.

„Потрагата по слобода и правда од страна на палестинскиот народ сега треба да се признае. Треба да се осврнеме на прашањата за човековите права, националните права, како и меѓународниот консензус и право“, истакна Зомлот.

„Она што Израел го разбира се воените решенија, насилството, заплашувањето цивили и вршењето притисок врз цивилните заедници“, рече палестинскиот амбасадор.

Тој истакна дека способноста на Израел да ја изврши сета оваа суровост е можна само преку дехуманизирање на Палестинците.

„Сигурно имате слушнато. Израелски министри нè нарекоа „животни налик на луѓе“. Бидејќи не можете да убивате обични луѓе на овој начин, мора да ги дехуманизирате“, рече тој.

Зомлот, кој привлече внимание со своите изјави и настапи на бројни западни телевизиски канали како „Си-ен-ен“ и „Би-би-си“, силно ги критикуваше напорите на Израел да се прикаже себеси како жртва.

Најмалку 17.700 Палестинци загинаа, а над 48.780 лица се повредени во немилосрдните воздушни и копнени напади на Израел врз енклавата од 7 октомври, по прекуграничниот напад на Хамас.

Според официјалните податоци, бројот на загинати Израелци во нападот на Хамас изнесува 1.200.