Пакистанскиот премиер ја потврди поддршката на својата земја за суверенитетот на Либан

Пакистанскиот премиер Шехбаз Шариф ја потврди „непоколебливата поддршка“ на Исламабад за суверенитетот и територијалниот интегритет на Либан за време на разговорите со либанскиот колега Наваф Салам во Њујорк, соопшти неговиот Кабинет вчера, јавува Анадолу.

Двајцата лидери се сретнаа на маргините на 81. сесија на Генералното собрание на ОН и разговараа за билатералните односи, како и за случувањата на Блискиот Исток и во поширокиот регион.

Шариф ја повтори поддршката на Пакистан за „суверенитетот, политичката независност, единството и територијалниот интегритет“ на Либан, се наведува во соопштението објавено на неговиот официјален профил на американската платформа за социјални медиуми X.

Тој повика на итен прекин на непријателствата меѓу Израел и Либан, строго почитување на договорите за прекин на огнот, целосно повлекување на израелските сили од либанската територија и целосно спроведување на релевантните резолуции на Советот за безбедност на ОН.

Шариф и Салам разговараа и за проширување на соработката преку контакти на високо ниво, трговија и инвестиции, одбранбени врски и институционална соработка, при што ветија продолжување на координацијата во ОН и на други мултилатерални форуми.

Во средата Шариф во Њујорк се сретна со генералниот секретар на ОН, Антонио Гутереш.

Гутереш му се заблагодари на Пакистан за неговата улога како избрана непостојана членка на Советот за безбедност на ОН и за придонесот во мировните операции на ОН, се наведува во соопштението на светската организација.

Двајцата разговараа и за случувањата на Блискиот Исток и за исламофобијата.

Општата дебата на Генералното собрание на ОН започна во вторникот и ќе трае до 28 септември.