ЖЕНЕВА (AA) - Ескалацијата на тензиите на Блискиот Исток веќе предизвикува нови бранови раселување, особено во Либан, каде што повеќе од 90.000 луѓе биле принудени да ги напуштат своите домови, предупреди денес Агенцијата на ОН за миграција, јавува Анадолу.

„Нови бранови на раселување се забележани особено во Либан и преку границата кон Сирија“, изјави портпаролот на Меѓународната организација за миграции, Мохамедали Абунаџела, на брифинг со новинарите во Женева.

„Во Либан, наредбите за евакуација доведоа до раселување на повеќе од 90.000 луѓе, а од утрово се проценува дека бројот е многу поголем“, рече тој.

Регионалните тензии ескалираа по нападите на САД и Израел врз Иран, што започнаа на 28 февруари. Техеран потоа изврши одмазднички напади врз Израел и врз земји од регионот, вклучително и оние во Заливот каде што се наоѓаат американски бази, што предизвика нарушувања на глобалните пазари.

Во меѓувреме, Израел ја прошири офанзивата против Хезболах во Либан, каде што на крајот на 2024 година беше постигнат прекин на огнот со оваа група.

Абунaџела истакна дека овие движења на населението покажуваат како нестабилноста во една земја може брзо да доведе до прекугранично раселување.

Тој предупреди и дека кризата ги нарушува хуманитарните синџири на снабдување.

„Во исто време, затворањата на воздушниот простор и прекините на поморските рути, особено низ Ормутскиот Теснец, значајна поморска рута за глобалната трговија и снабдувањето со храна, создаваат дополнителни предизвици“, рече тој.

Според ИОМ, ваквите нарушувања ги зголемуваат трошоците за транспорт и гориво, како и доцнењето во испораката на хуманитарна помош.

Пред последната ескалација, повеќе од 19 милиони луѓе на Блискиот Исток веќе биле внатрешно раселени поради конфликти, насилство и природни катастрофи, при што најголем број има во Судан, Сирија и Јемен, а значителни раселени популации има и во Ирак и Либија, соопшти Агенцијата на ОН.

„Секоја понатамошна ескалација ризикува да предизвика нови бранови раселување и хуманитарни потреби во повеќе земји“, предупреди портпаролот, нагласувајќи дека луѓето кои се принудени да бегаат итно имаат потреба од поддршка, вклучувајќи итно засолниште, храна, безбедна вода, здравствени услуги, заштита и психолошка помош.

Тој додаде дека „деескалацијата е од суштинско значење“, повикувајќи на заштита на цивилите, вклучително и мигрантите и раселените лица, како и почитување на меѓународното хуманитарно право за да се спречи понатамошно човечко страдање.