ОН предупредуваат: Прекинот на снабдувањето на Израел може да ја остави Газа без струја и вода за пиење

ЖЕНЕВА (АА) - Прекинот на снабдувањето од страна на Израел може да ја остави електраната во Газа без гориво во рок од неколку дена и може да предизвика сериозен недостиг на вода за пиење за 610.000 луѓе, објави хуманитарната агенција на Обединетите нации (ОН), јавува Анадолу.

„Израелските власти престанаа да го снабдуваат Појасот Газа со електрична енергија, намалувајќи ги часовите на електрична енергија на три или четири часа дневно. Електраната во Газа моментно е единствен извор на енергија и може да остане без гориво за неколку дена“, изјави Јенс Лаерке, портпарол на Канцеларијата на ОН за координација на хуманитарни прашања (OCHA), на прес-конференцијата на ОН во Женева.

Во врска со прекинот на водоснабдувањето, Лаерке рече:

„Оваа одлука влијае врз повеќе од 610.000 луѓе во Газа и ќе резултира со сериозен недостиг на вода за пиење.“

Џејмс Елдер, портпарол на УНИЦЕФ, исто така, изрази загриженост поради одлуката на Израел да го прекине снабдувањето.

„УНИЦЕФ е вознемирен од прекинот на снабдувањето со вода и храна за Газа“, рече Елдер, потсетувајќи ги страните на нивните обврски според меѓународното право.

Военото крило на Хамас, Бригадите Ал-Касам, во саботата наутро започна сеопфатна операција наречена „Поплава Акса“. Илјадници ракети беа истрелани од Газа кон Израел, а вооружени групи навлегоа во населбите во регионот.

Групата соопшти дека операцијата била одговор на израелските напади врз комплексот на џамијата „Ал Акса“ во окупираниот Источен Кудс (Ерусалим) и зголеменото насилство од доселениците.

Бројот на Палестинци убиени од израелските сили во Газа се искачи на 704, од кои 143 деца и 105 жени, соопшти рано утринава Министерството за здравство со седиште во Газа. Се вели дека бројот на ранети се искачил на околу 4.000.

Според Министерството за здравство, најмалку 900 Израелци загинале, а повеќе од 2.600 се ранети.