Aleyna Çil
08 Септември 2023•Ажурирај: 11 Септември 2023
ЊУЈОРК (АА) - Обединетите нации (ОН) објавија дека до 2030 година околу 340 милиони жени и девојчиња би можеле да се борат со екстремна сиромаштија, јавува Анадолу.
UN Women објави извештај за моменталната состојба во поглед на родовата рамноправност и зајакнувањето на жените во рамките на „Целите за одржлив развој“, чија цел е да се стави крај на сите форми на сиромаштија до 2030 година.
Во извештајот се истакнува дека глобалните „Цели за одржлив развој“ заостануваат и се наведува дека ако сегашниот напредок не добие замав, до 2030 година 340 милиони жени и девојчиња ќе живеат во екстремна сиромаштија, а 110 милиони жени и девојчиња ќе бидат лишени од можноста за образование.
Во извештајот се наведува дека на жените им се плаќа само 51 отсто од заработката на мажите за работа која е идентична по квалитет и квантитет, а доколку ваквата состојба продолжи, речиси четвртина од жените и девојките ќе искусат несигурност за храна.
Се истакнува и дека доколку развојот не се забрза, следната генерација жени и девојчиња ќе бидат ангажирани во неплатена работа и во домашни работи приближно 2,5 часа дневно повеќе од мажите.
Извештајот, каде што родовата рамноправност, зајакнувањето на жените и климатските промени се оценуваат заедно за прв пат, предвидува дека до 2050 година уште 158,3 милиони жени и девојчиња ќе се соочат со сиромаштија поради климатските промени.
Се нагласува дека покрај сегашните бројки, 131 милион мажи и 236 милиони жени и девојки ќе се соочат со несигурност во храна поради климатските промени.
Во извештајот се наведува дека женската популација која живее во подрачјата на судири се зголемила за 50 отсто од 2017 година и достигнала 614 милиони во 2022 година, како и дека годишно се потребни дополнителни 360 милијарди долари помош за да се постигне глобална родова рамноправност и целите за зајакнување на жените.
