Bayram Altuğ
01 Април 2022•Ажурирај: 02 Април 2022
ЖЕНЕВА (АА) - Обединетите нации (ОН) објавија дека најмалку 1.276 цивили ги загубиле животите во Украина во нападите на Русија, 1.981 цивил се повредени, а 4.102.876 бегалци пребегале во соседните земји, пренесува Агенција Анадолија (АА).
Во соопштението на Високиот комесаријат за бегалци на Обединетите нации (УНХЦР), објавени се податоци добиени од различни извори во врска со бегалската криза во Украина.
Се наведува дека во периодот од 24 февруари до 31 март, 4.102.876 бегалци од Украина преминале во соседните земји, од кои повеќе од половина заминале во Полска.
Најголем број бегалци преминале во Полска (2.384.814), по која следуваат Романија (623.627), Молдавија (390.187), Унгарија (374.535) и Словачка (292.039), а 113.000 преминале во Русија од регионите Доњецк и Луганск во периодот од 21 до 23 февруари.
Познато е дека стотици илјади украински бегалци, по преминувањето во соседните земји, оттаму заминаа во други европски земји.
Од друга страна, Меѓународната организација за миграција (ИОМ), која е дел од ОН, објави дека и 6,5 милиони цивили се раселени во Украина, со што вкупниот број на Украинци раселени во земјата и надвор од неа се зголеми на 10 милиони.
- Најмалку 1.276 цивили ги загубија животите -
Според Високиот комесаријат за човекови права на ОН, најмалку 1.276 цивили ги загубиле животите, а 1.981 цивил биле ранети во руско-украинската војна од 24 февруари до 31 март.
Во соопштението се нагласува дека бројот на загинати и повредени цивили можно да е многу поголем од утврдениот.
Се истакнува дека повеќето цивилни жртви биле предизвикани од употребата на експлозивно оружје со широк опсег на ефекти, вклучувајќи бомбардирање и воздушни напади од тешка артилерија и повеќецевни ракетни системи.
Генералното обвинителство на Украина соопшти дека од 24 февруари, кога Русија ги започна нападите, досега загинаа 153 деца, а 245 деца се повредени.
Обединетите нации ги објавуваат само бројките што можат да ги потврдат во врска со цивилните жртви во Украина. Според украинските власти, бројот на цивили кои ги загубиле животите е многу поголем.
