Одрони од кал и земја однесоа 16 животи во источна Кина

Најмалку 16 лица загинаа откако одрони од кал и земја, предизвикани од дождовите, ја погодија покраината Џиангси во источна Кина, објавија денес државните медиуми, пренесува Анадолу.

Катастрофата, која е последна во низата слични инциденти во последните месеци, се случи во округот Суичуан, соопшти новинската агенција „Синхуа“, повикувајќи се на локалните власти.

Повеќедневните поројни дождови предизвикаа низа геолошки катастрофи во округот.

До вчера попладне, властите евакуираа над 18.000 жители на округот.