НАТО испраќа контејнери како привремено засолниште за погодените по земјотресите во Туркије

ЛОНДОН (АА) - НАТО ја продолжи поддршката за Туркије откако 600 контејнери за привремени засолништа беа испратени во областите погодени од земјотресот, соопшти Алијансата, пренесува Анадолу.

„Трговскиот брод со првите 600 контејнери за привремено засолнување на НАТО за погодените од земјотресите во Туркије – од вкупно над 1.000 – го напушти пристаништето во Таранто, Италија, во неделата вечер“, се вели во соопштението на НАТО.

Во соопштението се наведува дека пратката ќе обезбеди привремено засолниште за најмалку 4.000 луѓе погодени од неодамнешните разорни земјотреси.

„Во Искендерун се очекува да пристигнат следната недела, а поставувањето на кампот се очекува да започне откако опремата ќе биде истоварена и предадена на земјата“, се нагласува во соопштението.

Меѓу другото, НАТО соопшти дека го координира стратешкиот воздушен пренос на шатори од Пакистан во Туркије.

Во знак на солидарност, генералниот секретар на НАТО Јенс Столтенберг во четвртокот ја посети Туркије и разговараше со турскиот претседател Реџеп Таип Ердоган.

Според последните официјални податоци, најмалку 41.020 луѓе ги загубиле животите во двата силни земјотреси што на 6 февруари ја погодија јужна Туркије.

Земјотресите со јачина од 7,7 и 7,6 степени со епицентри во Кахраманмараш погодија 11 области, во кои се засегнати повеќе од 13 милиони луѓе.