Mücahithan Avcıoğlu
11 Јули 2025•Ажурирај: 14 Јули 2025
ИСТАНБУЛ (АА) - Вкупното население на 27-те земји членки на Европската Унија достигна 450,4 милиони жители на 1 јануари 2025 година, покажуваат официјалните податоци на Евростат објавени денес, јавува Анадолу.
Населението на ЕУ се зголемило за 1,07 милиони луѓе во споредба со претходната година, а ова е четврта година по ред со пораст, откако во 2021 година беше забележан пад како последица на пандемијата на Ковид-19.
На почетокот на 2024 година, населението на ЕУ изнесуваше 449,3 милиони.
Според проценките и прелиминарните податоци, Германија ќе остане најнаселена членка на ЕУ во 2025 година со 83,6 милиони жители, по неа следува Франција со 68,6 милиони, Италија со 58,9 милиони, Шпанија со 49,1 милион, Полска со 36,5 милиони, Романија со 19 милиони, Холандија со 18 милиони и Белгија со 11,9 милиони жители.
Од друга страна, најмалку населени земји во ЕУ се Малта со 574.000 жители и Луксембург со 681.000 жители.
„Забележаниот пораст на населението во голема мера може да се припише на зголемените миграциски движења по Ковид-19“, се наведува во соопштението на Евростат.
Од 2012 година наваму, негативната природна промена (повеќе починати отколку родени) во населението на ЕУ е надоместена со позитивната нето-миграција, додава статистичката служба на Унијата.
