Said Amori
03 Јуни 2024•Ажурирај: 05 Јуни 2024
КУДС (ЕРУСАЛИМ) (АА) - Израел ги прифати повеќето од општите контури од предложениот договор за размена на заложници и за прекин на огнот објавен кон крајот на минатата недела од американскиот претседател Џо Бајден, соопшти Израелската радиодифузна управа, пренесува Анадолу.
Државната телевизија соопшти и дека палестинската група Хамас најавила дека позитивно ќе одговори на предлогот.
Се наведува дека планот во три фази ќе започне со шестнеделен прекин на огнот, вклучително и повлекување на израелските сили од Газа и ослободување на жените и децата што се држат како заложници во енклавата. Бајден истакна дека за тоа време ќе има зголемување на хуманитарната помош, а Израел и Хамас ќе преговараат за траен прекин на огнот.
Според медиумот, втората фаза ќе вклучува ослободување на сите преостанати заложници во замена за Палестинците затворени во Израел.
Последната фаза ќе вклучува почеток на план за обнова на Газа и враќање на останките на починатите заложници на нивните семејства.
Бајден рече дека Израел го предложил договорот.
Тој го повика Хамас да го прифати предлогот и го повика израелскиот премиер Бенјамин Нетанјаху да се спротивстави на притисокот од членовите на неговата владина коалиција за негово отфрлање.
Сепак, Кабинетот на Нетанјаху во петокот ја повтори намерата на Израел да ја продолжи својата смртоносна офанзива во Газа додека не се постигнат сите негови воени цели.
Хамас рече дека „ќе одговори позитивно на секој предлог што вклучува траен прекин на огнот, целосно повлекување на израелските трупи од Појасот Газа, активности за обнова, враќање на раселените и завршување на сеопфатен договор за размена на заложници“.
Израел започна брутална офанзива врз Појасот Газа по нападот на Хамас на 7 октомври, при што загинаа повеќе од 36.400 луѓе, од кои огромно мнозинство жени и деца, а повредени се повеќе од 82.600.
Речиси осум месеци од почетокот на израелските напади огромни делови од Газа се во урнатини, а недостигаат храна, чиста вода и лекови.
Израел е обвинет за геноцид пред Меѓународниот суд на правдата (МСП), кој во својата последна одлука му нареди на Тел Авив веднаш да ја прекине операцијата во Рафа, каде што засолниште од војната најдоа над еден милион Палестинци.
