Burç Eruygur
27 Март 2023•Ажурирај: 28 Март 2023
ИСТАНБУЛ / БРИСЕЛ (АА) - Кремљ денес соопшти дека реакциите од Западот нема да ги нарушат плановите на Москва за распоредување тактичко нуклеарно оружје во соседна Белорусија, јавува Анадолу.
„Таквата реакција [од Западот], се разбира, не може да влијае врз плановите на Русија“, изјави портпаролот на Кремљ, Дмитриј Песков, на брифингот со новинарите во Москва.
Песков понатаму рече дека рускиот претседател Владимир Путин во саботата дал детално интервју за руските медиуми објаснувајќи ја ситуацијата.
„Нема што да се додаде на ова“, рече портпаролот.
Путин во интервјуто за ТВ-каналот „Россија-24“ рече дека Русија ќе ја заврши изградбата на специјално складиште за тактичко нуклеарно оружје во Белорусија и дека веќе го предала комплексот „Искандер“ на складирање.
Како одговор на изјавата на Путин, ЕУ и НАТО ги опишаа потегот на Москва, како и прекршувањето на практиките за непролиферација на нуклеарното оруже како опасни.
Во меѓувреме, Украина рече дека Кремљ „ја зел Белорусија како нуклеарен заложник“.
Откако Русија ја започна војната во соседна Украина пред 13 месеци, западните лидери и аналитичари изразија загриженост дека Москва би можела да го направи конфликтот нуклеарен, врз основа на изјавите на руската страна од кои Западот гледа дека сите опции се на маса.
