Италија го враќа во сила прекинот на работа и мерки за поддршка на платите поради екстремниот топлотен бран

Италија повторно ги воведе правилата за прекин на работните активности и мерките за поддршка на платите како одговор на интензивирањето на топлотниот бран низ Европа, јави денес новинската агенција АНСА, пренесува Анадолу.

Како што јави новинската агенција АНСА, повикувајќи се на Кабинетот на премиерот, со оваа владина уредба за инфраструктура се активираат регулативи што беа на сила и во изминатите години.

Уредбата им дозволува на одредени компании да ја прекинат или намалат работата за време на екстремни горештини и на работниците им овозможува пристап до шемите за поддршка на платите преку привремени изземања.

Денес 15 града беа ставени под црвен метеоаларм поради горештините, а се очекува тој број утре да се искачи на 16 града, меѓу кои Рим, Фиренца и Милано.

За време на викендот во Парма повеќе од илјада луѓе ги посетиле итните медицински служби, а 370 посети имало во саботата, според Скај Тг24.

Во Милано, исто така, беа пријавени падови на напонот во електричната мрежа.

Бергамо и Торино неодамна се соочија со привремени прекини во снабдувањето со електрична енергија, предизвикани од зголемената побарувачка за струја поради користењето на клима-уредите и оптоварувањето што високите температури го предизвикуваат врз инфраструктурата.