Трамп рече дека САД размислуваат за „промена на името на езерото Онтарио во езеро Америка“

Американскиот претседател Доналд Трамп денес истакна дека Вашингтон размислува за „промена на името на езерото Онтарио во езеро Америка“, поради обновените трговски тензии со Канада, пренесува Анадолу.

„Соединетите Американски Држави сериозно размислуваат за промена на името на езерото Онтарио во езеро Америка бидејќи не очекуваме повеќе да соработуваме со Онтарио“, напиша Трамп на својата платформа Трут социал.

Езерото Онтарио се граничи со канадската покраина Онтарио на север и со американската сојузна држава Њујорк на југ, а границата меѓу Канада и САД минува низ езерото.

Вчера Трамп рече дека Канада е „меѓу најлошите земји во светот за соработка. Тие се однесуваат како да имаат право на сè, а сепак НИЕ НЕМАМЕ ПОТРЕБА ОД КАНАДА, ТИЕ ИМААТ ПОТРЕБА ОД НАС“.

По прекинот на преговорите, во саботата стапи на сила царина од 50% за канадските стоки.

Трамп, исто така, објави дека дополнителна царина од 50% за канадските автомобили, камиони и автоделови ќе стапи на сила на 1 јануари 2027 година откако разговорите не доведоа до договор.

Премиерот на Онтарио, Даг Форд, и Трамп разменија навреди вчера по прекинот на трговските разговори меѓу Канада и САД.

Форд го нарече Трамп „диктатор“ и „крал на банкротите“ откако американскиот претседател го критикуваше на својата платформа за социјални медиуми Трут социал.

Трамп го повтори своето тврдење дека Канада „не може да преживее“ без САД и го нарече канадскиот премиер Марк Карни „гувернер Карни“, осврнувајќи се на неговиот притисок Канада да стане 51. американска држава.