Alaattin Doğru
08 Октомври 2020•Ажурирај: 09 Октомври 2020
ПАРИЗ
Истражувањето спроведено во Франција покажа дека 61 процент од испитаниците сметаат дека претседателот Емануел Макрон не успеал да се справи со пандемијата од Ковид-19, пренесува Агенција Анадолија (АА).
Истражувачкиот институт ЕЛАБ за телевизијата БФМТВ на 7 октомври спроведе истражување за тоа дали Макрон успешно се справувал со Ковид-19.
Според истражувањето, 6 од 10 лица во Франција го обвинуваат Макрон дека „не може да се справи со кризата од пандемијата“ и дека „лошо ја управувал“.
Стапката на испитаниците кои мислат дека претседателот на Франција не носел правилни одлуки во врска со здравствениот план достигнува 55 проценти.
Од друга страна, процентот на оние кои сметаат дека Владата и Макрон не ги научиле потребните лекции од првиот бран на Ковид-19 е 65 проценти.
- „Арогантен“ и „репресивен“ претседател
Од анкетираните, 65 проценти сметаат дека Макрон е арогантен претседател, додека 63 проценти од нив велат дека тој е репресивен. Стапката на оние кои сметаат дека францускиот претседател може „да ги спои Французите“, останува на 26 проценти.
- Довербата во Макрон и Владата се намалува
Анкетите спроведени во Франција откриваат дека се намалува довербата на јавноста во претседателот Макрон и во премиерот Жан Кастекс.
Во седум различни истражувања за доверба спроведени во септември во земјата, откриено е дека довербата во Макрон, која беше околу 41 процент, се намали за 2,4 поени и сега изнесува 38,7 проценти.
Додека популарноста на премиерот Жан Кастекс во јули кога беше избран изнесуваше 49,4 проценти, процентот на оние кои размислуваа позитивно за него падна за 7,11 поени и сега во септември изнесуваше 42,29 проценти.
- Во земјата бројот на случаи со Ковид-19 рапидно се зголемува
Во Франција во последните 24 часа Ковид-19 е регистриран кај 18.746 лица, и тоа е најголема бројка на случаи забележана од почетокот на епидемијата.
Бројот на луѓе кои починаа поради епидемијата се искачи на 32.445, а вкупниот број случаи, на 653.509.
