СКОПЈЕ (АА) - Иран денес изведе ракетен напад врз израелскиот аеродром „Бен Гурион“, центри за биолошки истражувања и командни и контролни објекти, како и врз Хаифа, објавија иранските државни медиуми, пренесува Анадолу.

Во нападите повредени се најмалку 23 лица во Израел, повеќето со лесни повреди, а едно лице е во умерена состојба, јави израелскиот дневен весник „Једиот Ахронот“.

Израелскиот јавен радиодифузер КАН јави за причинета штета на зграда во пошироката област на Тел Авив, а неколку други објекти низ крајбрежниот регион се уништени со директни удари.

Преку соопштение, иранското Министерство за надворешни работи истакна дека земјата го задржува правото да се брани од „американската агресија и злосторства извршени од страна на одметнатиот режим“, осврнувајќи се на претходните напади врз иранските нуклеарни објекти.

Ситуацијата во регионот дополнително се влоши откако американскиот претседател Доналд Трамп денес објави дека американските сили извршиле „многу успешни“ воздушни напади врз три ирански нуклеарни објекти, поради растечките стравувања од поширок конфликт во регионот.

Непријателствата избувнаа на 13 јуни кога Израел започна воздушни напади врз неколку локации низ Иран, вклучително и воени и нуклеарни постројки, што го натера Техеран да започне одмазднички напади.

Израелските власти соопштија дека најмалку 25 лица се загинати, а стотици се повредени оттогаш во иранските ракетни напади.

Во Иран, според податоците на иранското Министерство за здравство, 430 лица се загинати, а над 3.500 се ранети во израелските напади.