Израелската армија се повлече од град на Западнот Брег по еднонеделен напад

ИСТАНБУЛ (АА) - Израелската армија денес се повлече од градот Тамун на Западниот Брег по еднонеделниот упад, изјави локален претставник, јавува Анадолу.

„Армијата ненадејно и брзо ги повлече своите сили и ги напушти сите куќи што ги претвори во воени касарни откако ги протера нивните жители“, изјави за Анадолу градоначалникот на Тамун, Наџех Бани Одех.

Тој рече дека израелските сили оставиле зад себе големо разорување по воените операции во градот.

Според очевидци, израелската армија се повлекла од градот, но нејзините сили сѐ уште се распоредени околу подрачјето.

Силите на израелската армија сè уште оперираат во бегалскиот камп Ал-Фара јужно од Тубас во северниот дел на Западниот Брег, истакна локален активист.

„Окупациските сили продолжуваат да упаѓаат во кампот, да вршат рации во домовите, да ги иселуваат палестинските жители и да ги претвораат нивните домови во воени касарни“, изјави Калед Мансур за Анадолу.

Тој истакна дека израелските сили ги блокирале патиштата околу кампот, затворајќи го и спречувајќи го движењето.

Нападот врз Тамун е дел од поширокиот израелски воен напад кој започна на 21 јануари во Џенин и неговиот бегалски камп, каде што се убиени 25 Палестинци. На 27 јануари, нападот се прошири кон Тулкарем, при што се убиени уште најмалку четворица Палестинци.

Израелската ескалација се случува по договорот за прекин на огнот и размена на затвореници во Газа кој стапи во сила на 19 јануари, по над 15 месеци израелско бомбардирање, во кое се убиени речиси 48.200 Палестинци и со кое е опустошена енклавата.

Од почетокот на војната на 7 октомври 2023 година, израелските сили и еврејските доселеници убија најмалку 905 Палестинци низ окупираниот Западен Брег, според податоците на палестинското Министерство за здравство.