Mohammad Sıo
28 Декември 2023•Ажурирај: 29 Декември 2023
КУДС/ЕРУСАЛИМ (АА) - Израелската армија денес ја презеде одговорноста за воздушниот напад врз палестинскиот бегалски камп во централниот дел на Појасот Газа, во кој загинаа десетици луѓе, јавува Анадолу.
„ИДФ (армијата) жали за штетата нанесена на оние што не се вмешани и ќе извлече поука од инцидентот“, изјави портпаролот на војската за државната телевизија КАН.
Најмалку 86 лица загинаа, а десетици беа повредени кога борбени авиони на 24 декември извршија напад на две станбени згради во бегалскиот камп Ал-Магази, според локалните здравствени власти.
Израелски воен претставник изјави дека за високиот број загинати во нападот се виновни „несоодветните убојни средства“.
„Типот муниција не одговараше на природата на нападот, предизвикувајќи голема колатерална штета што можеше да се избегне“, изјави претставникот за израелската телевизија КАН.
Израел започна немилосрдни воздушни и копнени напади врз Појасот Газа како одмазда за прекуграничниот напад на палестинската група Хамас на 7 октомври.
Оттогаш најмалку 21.110 Палестинци се убиени, а 55.243 се повредени, според здравствените власти во енклавата.
Израелските напади ја претворија Газа во урнатини, при што 60 отсто од инфраструктурата на енклавата е оштетена или уништена, а речиси два милиона луѓе се раселени поради сериозен недостиг на храна, чиста вода и лекови.
