ГАЗА (АА)
- Мустафа ХАБУС
Израел се подготвува за копнен напад врз Рафа и планира насилно да протера околу 1,4 милиони раселени Палестинци во тој град во регионот Ал-Маваси, јавува Анадолу.
Сепак, Ал-Маваси не може да прими толку многу луѓе поради неговата многу мала површина и недостатокот на каква било инфраструктура.
Израел сака да го окупира градот Рафа по копнен пат, а претходно го прогласи за безбедна зона за луѓето при нападот на северниот дел на Појасот Газа, и насилно да го протера населението оттаму.
По објавувањето на намерата да го нападне Рафа, Владата во Тел Авив, по реакциите и предупредувањата на меѓународната заедница и арапските земји, најави дека ќе се обезбеди безбедносен коридор за стотици илјади раселени лица да го напуштат градот.
Според наводите на израелските медиуми, Палестинците од Рафа насилно ќе бидат протерани во Ал-Маваси, кој се наоѓа на запад од регионот и за кој се тврди дека е безбедна зона. Израелската Влада, пак, се воздржува од прогласување на регионот во кој ќе ги испрати Палестинците.
Во интервју дадено за американскиот канал „Еј-би-си њуз“ на 11 февруари, израелскиот премиер Бенјамин Нетанјаху рече дека на стотиците илјади Палестинци раселени во Рафа ќе им се обезбеди „безбеден премин“ пред евентуален копнен напад.
Нетанјаху рече дека работат на „детален план“ за да се обезбеди „безбеден премин“ за евакуација на повеќе од милион Палестинци кои се засолниле во градот Рафа, кој тој го опиша како последно упориште на Хамас во Газа.
Сместен на брегот на Средоземното Море, на околу 28 километри југозападно од Газа, Ал-Маваси е област долга 12 километри и широка околу еден километар.
Се наоѓа во југоисточниот дел на долината Газа во областа од Деир ал-Балах на север, поминувајќи низ Кан Јунис сè до Рафа.
Во Ал-Маваси, кој се состои од обработливо земјиште и песочни дини, илјадници раселени Палестинци во моментов живеат во шатори поради недостаток на каква било инфраструктура.
Јасно е дека е невозможно да се сместат стотици илјади луѓе во Ал-Маваси, кој сочинува само три отсто од Појасот Газа, чија површина е околу 12 илјади квадратни километри.
Ал-Маваси, кој е поделен на два географски меѓусебно поврзани региони, едниот лоциран во Кан Јунус, а другиот во Рафа, главно се состои од земјоделско земјиште и пусти песочни дини.
Населението на Ал-Маваси, каде што од античко време живееле главно земјоделски семејства, се проценува на околу девет илјади.
Територијата на Ал-Маваси, која била доделена на земјоделски семејства уште од отоманскиот период и британскиот мандат, била регистрирана на име на државата.
Ал-Маваси, кој беше припоен кон границите на Египет откако Израел ја окупираше палестинската територија во 1948 година, подоцна стана важен туристички регион на Појасот Газа.
Израелската Армија го окупираше Појасот Газа, вклучувајќи го и Ал-Маваси, за време на тристраниот напад на Египет во 1956 година, но се повлече по пет месеци, враќајќи го Ал-Маваси под египетска власт.
По повторната окупација на Појасот Газа во 1967 година, Израел изгради населби во регионот Ал-Маваси.
Ал-Маваси беше евакуиран во 2005 година во согласност со едностраниот план за повлекување на поранешниот израелски премиер Ариел Шарон, така што земјиштето во регионот беше вратено на семејствата кои живеат таму и се занимаваат со земјоделство.
Бројот на станбени единици во Ал-Маваси во моментов изнесува околу стотина. Дополнително, во регионот нема потпорна инфраструктура, канализација, електрична и комуникациска мрежа или асфалтирани патишта.
Ал-Маваси е именуван по процесот со кој земјоделците во регионот црпат вода со копање вдлабнатини на површината на почвата за наводнување на посевите.
По ескалацијата на израелските напади и копнените напади врз различни делови на Појасот Газа, илјадници Палестинци беа принудени да мигрираат во Ал-Маваси каде што поставија шатори.
Израел претходно ги покани Палестинците кои насилно ги раселуваше да се населат во Ал-Маваси. Израелската Армија која го прогласи Ал-Маваси за безбедна зона, изврши воздушни и копнени напади во регионот во јануари и ги протера раселените Палестинци во Рафа.
Палестинската Црвена полумесечина на 22 јануари објави дека израелските авиони гаѓале четири бегалски центри во регионот Ал-Маваси.
Во вестите објавени на 23 јануари, палестинската агенција ВАФА објави дека израелските авиони бомбардирале шатори каде што престојувале бегалците во Ал-Маваси, а во нападот биле убиени и повредени десетици луѓе.
Израел, кој уби десетици илјади Палестинци во нападите врз Појасот Газа, го принуди најголемиот дел од населението во северните и централните делови на регионот да побегне во Рафа на египетската граница.
Израелската Армија од воздух го напаѓа јужниот регион, кој за време на нападот беше прогласен за „безбедна зона“ за луѓето од северот на Појасот Газа, а сега во Рафа планира да изврши инвазија по копно и да го принуди тамошното население да ја напушти областа.
Се проценува дека во моментот во Рафа се наоѓаат околу еден милион и 400 илјади цивили.
Меѓународната заедница го предупредува Израел дека нападот од поголеми размери врз Рафа ќе предизвика уште една голема трагедија.
