ВАШИНГТОН (АА) - Бројот на жртви во протестите во Иран се искачи на 4.029, соопшти денес американската Новинска агенција на активисти за човекови права (HRANA), јавува Анадолу.

Вкупно 26.015 лица се приведени на 23-тиот ден од националните протести во земјата, според податоците собрани од агенцијата.

Според извештајот, најмалку 5.811 лица се здобиле со тешки повреди за време на протестите.

Иран од минатиот месец е потресен од бран протести, кои започнаа на 28 декември во Техеран, поради наглото намалување на вредноста на иранскиот ријал и влошувањето на економските услови. Демонстрациите подоцна се проширија во неколку други градови.

Официјалните лица ги обвинија САД и Израел дека ги поддржуваат „вооружените бунтовници“ кои извршиле неколку напади на јавни места низ целата земја.

Американскиот претседател Доналд Трамп постојано се закануваше дека ќе го нападне Иран доколку бидат убивани демонстранти, но подоцна го пофали Техеран за наводното откажување на стотици закажани егзекуции.