Идлиб: Во последните 24 часа, близу границата со Турција се раселија уште 39.000 цивили

ИДЛИБ (АА) - Поради интензивните напади на силите на Асадовиот режим во Сирија и Русија во Идлиб, во последните 24 часа се раселија уште околу 39.000 цивили, додека бројката на цивилите што присилно мигрирале од ноември 2019 година досега достигна 541.000 лица, пренесува Агенција Анадолија (АА).

Според информациите до кои дојде новинарот на АА од директорот на Канцеларијата за координација на интервенции на Сирија, Мухамед Халаџ, како резултат на интензивирање на нападите, продолжуваат миграциите од различни подрачја како Ериха, Серакиб и Џебел Завије во Идлиб.

Поради нападите од силите на режимот, кои се состојат од Војската на Асад и терористичките групи поддржани од Иран, и од Русија, во последните 24 часа уште 36.377 цивили се раселени.

Поголемиот дел од раселените лица мигрираа во камповите што се наоѓаат на граничната линија со Турција, додека дел од нив се засолнуваат во зоните што беа исчистени од терористите во турските операции „Штитот на Еуфрат“ и „Маслинова гранка“.

Од ноември 2019 година досега од населените места во западното и јужното рурално подрачје на Алепо, како и во јужното и југоисточното рурално подрачје на Идлиб, раселени се околу 541.000 цивили.

Исто така, продолжуваат миграциите и од зоните во западното и јужното рурално подрачје на Алепо, Дарет Изе, Етариб, Хирејтан, Хајан, Анадан и Ајнџара.