Европските лидери се согласија да ја продолжат поддршката за Украина, но имаа различни ставови за праќањето мировници

АТИНА (АА) - Европските лидери, кои се состанаа во Париз на повик на францускиот претседател Емануел Макрон за да разговараат за Украина, се согласија да ја продолжат поддршката за Киев, но имаа различни ставови околу можноста за праќање мировни сили, како што предложи британскиот премиер Кир Стармер, јавува Анадолу.

По состанокот, Стармер остана на ставот дека треба да се разгледа опцијата за праќање мировници во Украина.

„Подготвен сум да ја разгледам можноста за распоредување британски сили на терен заедно со другите, но само доколку има траен мировен договор“, изјави тој.

Сепак, Стармер додаде: „Мора да постои американска гаранција бидејќи само безбедносен договор поддржан од САД може ефикасно да ја одврати Русија од повторен напад врз Украина.“

Освен Стармер и Макрон, кој претходно изјави дека ова сценарио може да биде предмет на дискусија, и данската премиерка Мете Фредериксен соопшти дека Данска е отворена за оваа идеја.

Таа нагласи дека „прекин на огнот не значи автоматски мир ниту, пак, значи траен мир.“

Според неа, најважно е Европа да ги засили своите одбранбени капацитети и да продолжи да ја поддржува Украина.

Германскиот канцелар Олаф Шолц силно се спротивстави на идејата за праќање мировници во Украина.

„Искрено, многу сум иритиран од овие дебати. Луѓето зборуваат над главите на Украинците за исходот на мировните преговори што сè уште не започнале, кои Украина не ги одобрила и кои воопшто не се на маса“, изјави тој.

Сличен став изнесе и италијанската премиерка Џорџа Мелони, која истакна дека ова би било „најсложено и најмалку ефикасно решение, особено без доволни безбедносни гаранции за Украина.“

Шпанскиот премиер Педро Санчез предупреди дека каков било договор меѓу Украина и Русија не смее да ги повтори грешките од минатото и да ѝ овозможи на Русија повторно да напаѓа други земји.

Генералниот секретар на НАТО, Марк Руте, на социјалната мрежа Х изјави: „Европа е подготвена и решена да ја засили својата улога. Да води во обезбедувањето безбедносни гаранции за Украина. Деталите треба допрва да се утврдат, но посветеноста е јасна.“

По состанокот, претседателот на Европскиот совет, Антонио Коста, и претседателката на Европската комисија, Урсула фон дер Лајен, во заедничката објава напишаа:

„Денес во Париз потврдивме дека Украина заслужува мир постигнат преку сила. Мир што ќе ги почитува нејзината независност, територијален интегритет и ќе обезбеди силни безбедносни гаранции.“

„Европа ја презема својата одговорност во воената помош за Украина. Истовремено, потребен ни е сериозен раст во одбраната на Европа“, додадоа тие.

На состанокот во Париз европските лидери разговараа за трансатлантските односи, ситуацијата во Украина, можностите за мировни преговори и безбедноста во Европа.

Односите меѓу Европа и САД се влошија овој месец откако Трамп иницираше директни разговори со рускиот претседател Владимир Путин за мировен договор за Украина, без вклучување на европските земји.

На Минхенската безбедносна конференција изминатиот викенд специјалниот пратеник на Трамп за Русија и Украина, Кит Келог, потврди дека Европејците нема да бидат поканети на планираните преговори меѓу САД и Русија за мировен договор во Украина.

Дополнително, американскиот секретар за одбрана Пит Хегсет предложи европските земји, а не САД, да пратат мировни сили во Украина.

Хегсет нагласи дека секое вакво распоредување мора да биде надвор од НАТО и нема да биде покриено со член 5 за колективна одбрана, потенцирајќи дека американските војници нема да бидат дел од безбедносните аранжмани.