Европската комисија формално ја заврши постапката за Член 7 против Полска

ВАРШАВА (АА) - Европската комисија официјално ја заврши постапката за владеењето на правото, позната како Член 7, што ја започна против Полска пред седум години, пренесува Анадолу.

„Комисијата смета дека повеќе не постои јасен ризик од сериозно прекршување на владеењето на правото во Полска“, нагласи во соопштение.

Новата Влада „започна низа мерки за решавање на загриженоста за независноста на правосудниот систем, го призна приматот на законодавството на ЕУ и е посветена на имплементирање на сите пресуди поврзани со владеењето на правото“, се наведува во соопштението.

Членот 7 беше активиран во декември 2017 година поради загриженоста дека судските реформи во рамките на поранешната полска влада на партијата Право и правда (PiS) се спротивни на вредностите на ЕУ.

Членот 7 теоретски можеше да доведе до суспензија на правата на Полска за членство во ЕУ.

Ерик Мамер, портпаролот на претседателката на Европската комисија Урсула фон дер Лајен, рече дека Брисел „ќе продолжи да го следи и поддржува“ спроведувањето на акцискиот план од страна на Варшава.