Германскиот канцелар предупреди дека војната со Иран може да ја погоди Европа како пандемијата на Ковид-19

БЕРЛИН (АА) – Германскиот канцелар Фридрих Мерц денес повика на итен прекин на американско-израелската воена офанзива против Иран, предупредувајќи дека евентуална ескалација во поширок регионален конфликт би можела сериозно да ги погоди европските економии, јавува Анадолу.

„Доколку оваа војна ескалира во голем регионален конфликт, тоа би можело да биде товар на Германија и Европа дури поголем од оној што го почувствувавме за време на пандемијата на Ковид-19 или на почетокот на војната во Украина во февруари 2022 година“, изјави Мерц на заедничка прес-конференција во Берлин со сирискиот претседател Ахмед ал-Шара.

Тој посочи дека за време на средбата со Ал-Шара разговарале за последните случувања на Блискиот Исток и за ризиците од продолжен или проширен конфликт.

„Мислам дека можам да кажам дека претседателот Ал-Шара го има истиот скептицизам како нас во врска стратегиските цели на оваа војна“, додаде канцеларот.

„Се надеваме дека можеме да најдеме начини, а можеби и да разговараме со владите на САД и Израел, да ја завршиме оваа војна што е можно побрзо. Но, можноста за ова ќе биде јасна само во наредните денови, можеби недели“.

Канцеларот исто така повтори дека долгогодишниот спор околу програмата за нуклеарно оружје на Иран и, како што наведе, дестабилизирачките активности на Техеран во регионот „не може да се решат само со воени средства“.