Волкан Бозкир, новоизбраниот претседател на Генералното собрание на ОН, ја започнува својата нова должност

ЊУЈОРК

Волкан Бозкир, новоизбраниот претседател на 75. Генерално собрание на Обединетите нации (ОН), денес ја започнува својата нова должност, јавува Агенција Анадолија (АА).

Бозкир, на церемонијата што ќе се одржи во седиштето на ОН, ќе ја преземе функцијата од Тиџани Мухамед-Банде, претседателот на 74. Генерално собрание.

ОН оваа година ја прославуваат својата 75-годишнина. Волкан Бозкир ќе го води 75-тото претседателство на Генералното собрание на организацијата, во кое се застапени 193 земји.

Бозкир е првото име од Турција избрано за претседател на Генералното собрание на ОН. Ја доби поддршката од 178 земји, а на функцијата ќе биде до септември 2021 година.

Претседателот на Генералното собрание на ОН раководи со седниците и го регулира функционирањето на Одборот. Генералното собрание го утврдува и контролира буџетот на ОН секоја година.

На Генералното собрание на ОН се носат одлуки кои го рефлектираат општото мислење на меѓународната заедница.

Светските лидери секоја година во средината на септември се собираат на состаноците на Генералното собрание на ОН во Њујорк. Оваа година, поради епидемијата од коронавирусот, состаноците на Генералното собрание ќе се одржат преку видеоконференции. На седницата што ќе започне на 22 септември, шефовите на државите и владите ќе се обратат преку видеоконференција.

- Кој е Волкан Бозкир?

Волкан Бозкир е роден на 22 ноември 1950 година во Анкара. Тој дипломирал на Правниот факултет на Универзитетот во Анкара. Како дипломат работел во Министерството за надворешни работи, бил заменик-генерален конзул во Штутгарт, прв секретар на Амбасадата во Багдад, потсекретар во постојаното претседателство на Организацијата за економска соработка и развој (OECD), генерален конзул во Њујорк, амбасадор во Букурешт и постојан претставник на Турција во Европската Унија (ЕУ).

Волкан Бозкир, исто така, работел како советник за надворешни работи во Кабинетот на Владата, генерален секретар во Кабинетот на претседателот, советник во Министерството за надворешни работи, заменик-потсекретар за прашања на ЕУ во Министерството за надворешни работи. Исто така е добитник на медал за заслуги на Романија и Италија.

Бозкир, исто така, трипати е избран за пратеник во Големото народно собрание на Турција од редовите на АК Партијата од градот Истанбул.

Меѓу другото, Бозкир беше претседател на Комисијата за надворешни работи и министер за Европска Унија и главен преговарач во 62-та Влада на Турција. Во 64-та Влада повторно беше назначен за министер за ЕУ и главен преговарач.

Бозкир многу добро ги владее англискиот и францускиот јазик.