Бројот на загинати во Газа надмина 39.500, во израелските напади убиени уште 31 Палестинец

АНКАРА (АА) - Израелската војска уби уште 31 Палестинец во нападите во Појасот Газа, со што вкупниот број на загинати од 7 октомври минатата година достигна 39.550, соопшти денес Министерството за здравство во енклавата, јавува Анадолу.

Во соопштението на Министерството се додава дека најмалку 91.280 Палестинци се повредени во израелските напади.

„Израелските сили убија 31 лице и повредија 62 во три „масакри“ врз семејства во последните 24 часа“, соопшти Министерството.

„Многу луѓе сè уште се заробени под урнатините и на патиштата бидејќи спасувачите не можат да стигнат до нив“, се додава.

Израел, прекршувајќи ја резолуцијата на Советот за безбедност на Обединетите нации со која се бара итен прекин на огнот, се соочи со меѓународна осуда поради неговата континуирана брутална офанзива врз Газа по нападот на Хамас на 7 октомври.

Речиси 10 месеци од почетокот на израелската војна, огромни делови од Газа се во урнатини каде владее блокада на храна, чиста вода и лекови.

Израел е обвинет за геноцид пред Меѓународниот суд на правдата, кој му нареди веднаш да ја прекине својата воена операција во јужниот град Рафа, каде што повеќе од еден милион Палестинци побараа засолниште од војната пред да започне копнената офанзива врз градот на 6 мај.