Бени Ганц се закани дека ќе ја напушти израелската Влада

АЛ-КУДС/ЕРУСАЛИМ (АА) – Членот на израелскиот Воен кабинет Бени Ганц се закани дека ќе поднесе оставка доколку се усвои сегашната верзија на законот за регрутација, кој ги ослободува ултраортодоксните Евреи Хареди од воена служба во земјата, јавува Анадолу.

Планирано е Предлог-законот за регрутација во својот сегашен облик да биде претставен пред Кнесетот (Парламентот) следнава недела за одобрување.

„Ние нема да бидеме членови на Владата ако законот за воена обврска биде усвоен во неговата сегашна форма. Ниту јас ниту моите партнери нема да бидеме членови на вонредната Влада доколку Кнесетот го одобри овој закон и го вклучи во законите на државата Израел“, рече Ганц во видеоснимката што го емитуваше каналот КААН, поврзан со Израелската радиодифузна корпорација.

Тој смета дека овој закон, доколку биде усвоен, ќе им наштети на единството и безбедноста на државата воопшто, а особено во време на војна.

Ганц се приклучи на вонредната Влада неколку дена по почетокот на израелската војна во Појасот Газа, иако не беше дел од десничарската Влада формирана од Бенјамин Нетанјаху.

Израелскиот опозициски лидер Јаир Лапид вчера го нападна Нацрт-законот за регрутирање што треба да биде претставен неделава, нарекувајќи го одраз на „најстрашната Влада во историјата на земјата“.

Неодамна во Израел контроверзијата за регрутацијата се врати во прв план откако десничарската влада предводена од Бенјамин Нетанјаху се обиде да одобри Нацрт-закон со кој ултраортодоксните Евреи се исклучуваат од воена служба и се зголемува периодот на задолжително служење од 32 на 36 месеци.

Прашањето за регрутирање на ултраортодоксните Евреи кои избегнуваат воена служба под изговор дека се посветуваат на проучувањето на Тората отсекогаш било „трнливо“ прашање во израелското општество.

Главниот израелски сефардски рабин Јицак Јосеф претходно во март се закани дека ултраортодоксните Евреи ќе ја напуштат земјата доколку бидат принудени да служат војска.

Според сегашниот израелски закон, Евреите кои се школуваат во јешивите (верските училишта) се ослободени од воена служба.