ИСТАНБУЛ (АА) - Австралискиот специјален претставник за борба против исламофобијата повика на истрага за употребата на сила од страна на полицијата и присилно отстранување на верниците за време на вчерашниот протестен собир во Сиднеј, пренесува Анадолу.

Според Си-би-си њуз, специјалниот пратеник Афтаб Малик, побарал од премиерот на Нов Јужен Велс, Крис Минс, да упати јавно извинување до муслиманската заедница.

„Нема апсолутно ништо на светот што би можело да го оправда однесувањето на полицијата да ги протера луѓето што се молеа на мирен, тивок и ненасилен начин, да ги удира, граба и фрла по бетонот“, изјави Малик.

Тој предупреди дека доколку полицијата не го признае прекршокот на полициските службеници, тоа ќе предизвика долгорочна штета врз односите со муслиманската заедница.

„Полицијата мора да признае дека тоа што се случи беше непредизвикано, непотребно и непропорционално, а доколку не го признае тоа, ќе предизвика непоправлива штета во односите меѓу муслиманите и полицијата на Нов Јужен Велс“, рече тој.

Во меѓувреме, премиерот Ентони Албаниз денес повика на смиреност, опишувајќи го насилното однесување на полициските службеници како „катастрофално“.

Говорејќи во Парламентот, каде што опозициската партија на Зелените побара израелскиот претседател да биде вратен дома, Албаниз изјави: „Насилството што го видовме синоќа беше катастрофално и знам дека сите Австралијци ги доживеаја тие сцени како многу вознемирувачки.“

Тој додаде дека полицијата на Нов Јужен Велс ќе ги „прочешла” снимките од инцидентот, особено оние што се однесуваат на верниците кои се молеле во моментот кога била употребена сила.

Снимките од протестот што кружат на интернет го прикажуваат насилното однесување на полицијата, при што ги отстранува и влече муслиманските верници што извршувале молитва. Инцидентот предизвика длабока осуда, вклучително и од Австралискиот национален совет на имами, кој постапките на полицијата ги опиша како „шокантни, длабоко вознемирувачки и целосно неприфатливи.“

Полицијата и демонстрантите се судрија откако илјадници луѓе вчера излегоа на улиците низ Австралија за да протестираат поради посетата на израелскиот претседател Исак Херцог.

Херцог престојува во официјална посета на Австралија и од пристигнувањето е под силно обезбедување, од полицијата, израелските безбедносни служби и снајперистите. Тој се сретна со лидерите на еврејската заедница по терористичкиот напад на плажата Бонди во декември минатата година.

Минатата година специјалната истражна комисија на Советот за човекови права на ОН, за војната во Газа соопшти дека Израел врши геноцид и ги посочи изјавите на Херцог дадени по нападот на Хамас на 7 октомври 2023 година како доказ за геноцидна намера.

Израел ја започна својата воена офанзива во Газа во октомври 2023 година. Според Министерството за здравство во Газа, убиени се повеќе од 72.000 Палестинци, над 171.000 се повредени, а 90 отсто од инфраструктурата во Појасот Газа е уништена.

И покрај прекинот на огнот, израелската армија продолжува да го прекршува договорот, при што се убиени 576 Палестинци, а 1.543 се повредени, соопшти Министерството.