ИСТАНБУЛ (AA) – Шведска денес изрази поддршка за единството и суверенитетот на Сомалија, по одлуката на Израел да го признае отцепениот сомалиски регион Сомалиленд, пренесува Анадолу.

„Во согласност со ЕУ, Африканската унија и релевантните регионални тела, Шведска ги почитува принципите на единството, суверенитетот и територијалниот интегритет на Сомалија“, напиша шведското Министерство за надворешни работи на социјалната мрежа Икс.

ЕУ во текот на викендот, исто така, изјави дека „повторно ја потврдува важноста на почитувањето на единството, суверенитетот и територијалниот интегритет на Сојузна Република Сомалија“, во согласност со нејзиниот устав и повелбите на Африканската унија и ОН.

Блокот повика и на „значаен дијалог“ меѓу Сомалиленд и Федералната влада на Сомалија „со цел надминување на долгогодишните разлики“.

Во петокот Израел стана прва земја во светот што го призна Сомалиленд како суверена држава, што предизвика бран реакции и осуди од голем број земји во Африка и на Блискиот Исток, меѓу кои и Турција, која беше дел од заедничката изјава објавена во саботата од Катар.

Сомалиленд, кој нема меѓународно признание откако прогласи независност од Сомалија во 1991 година, функционира како де факто независен административен, политички и безбедносен ентитет. Централната власт во Могадишу нема реална контрола врз регионот, додека раководството на Сомалиленд досега не успеа да обезбеди меѓународно признавање.

Сомалиската Влада одбива да го признае Сомалиленд како независна држава, го смета за составен дел од својата територија и секој директен договор или ангажман со регионот го оценува како кршење на суверенитетот и единството на земјата.