Lina Altawell
24 Февруари 2026•Ажурирај: 25 Февруари 2026
ГАЗА СИТИ/ИСТАНБУЛ (AA) - Силните врнежи ги поплавија шаторите во кои се засолнуваат раселените Палестинци низ Појасот Газа, во првата зимска бура што ја погоди територијата од почетокот на муслиманскиот свет месец Рамазан, влошувајќи ја уште повеќе тешката хуманитарна криза поради израелските ограничувања за доставување материјали за засолнување, изјавија официјални лица и очевидци, јавува Анадолу.
Доцна во понеделникот во Газа имаше врнежи од дожд и намалување на температурите, а се очекува времето да се смири навечер во вторник, наведе метеорологот Лаит ал-Алами во објавата на платформата Фејсбук на американската компанија за социјални медиуми.
Граѓанската заштита на Газа соопшти дека нејзините екипи добиле повеќе повици за помош во текот на ноќта, со пријави за поплавени кампови за раселени лица поради силниот дожд.
Екипите за спасување спасиле неколку семејства откако водата ги поплавила нивните шатори во областа Ал-Маваси западно од Кан Јунис во јужна Газа, соопшти агенцијата.
Очевидци за Анадолу изјавија дека водата, исто така, ги поплавила шаторите западно од градот Газа, особено во соседството Ал-Римал и во близина на пристанишната зона.
На видеата што се прикажуваат на социјалните медиуми се гледаат поплавени шатори во Ал-Римал, додека жителите се обидуваат да најдат решенија за да спречат дополнителна штета.
Од декември во серија зимски бури беа поплавени или однесени десетици илјади шатори, а се предизвика и уривање на веќе оштетените објекти, претходно погодени од израелските напади, при што десетици Палестинци загинаа или беа повредени. Некои починаа поради екстремен студ.
Околу 1,9 милиони од 2,4 милиони жители на Газа и понатаму се раселени и живеат во шатори без основни услови откако Израел им ги уништи домовите за време на војната.
Иако договорот за прекин на огнот стапи на сила на 10 октомври 2025 година, условите за живот не се значително подобрени бидејќи Израел продолжува да го блокира влегувањето на хуманитарна помоши и материјали за засолнување, вклучително и шатори и мобилни куќи.
Израел ја започна својата воена кампања на 8 октомври 2023 година, при што беа убиени повеќе од 72.000 Палестинци, повредени над 171.000, а уништена е и цивилната инфраструктура.
