„Повеќе од 15 милиони деца имаат потреба од хуманитарна помош во Судан, каде што војната влезе во трета година по ред“

ИСТАНБУЛ (АА) - Додека разорниот конфликт во Судан влегува во својата трета година, бројот на деца кои имаат потреба од хуманитарна помош драматично се зголеми - од 7,8 милиони на почетокот на 2023 година до над 15 милиони денес, соопшти УНИЦЕФ денес, јавува Анадолу.

„Без итна акција, тешката хуманитарна криза во Судан би можела да прерасне во уште поголема катастрофа“, предупредува УНИЦЕФ во своето соопштение.

Од агенцијата истакнуваат дека насилството, гладот и болестите се во пораст, раселувањето се влошува, пристапот до хуманитарна помош и средствата се намалуваат, а приближувањето на сезоната на дождови носи дополнителна закана од поплави и зголемена неисхранетост.

„Две години насилство и раселување ги уништија животите на милиони деца низ Судан. Потребите постојано ги надминуваат расположливите хуманитарни фондови“, изјави извршната директорка на УНИЦЕФ, Кетрин Расел.

Таа додаде дека приближувањето на сезоната на дождови дополнително ќе ја отежне мисијата за допирање до децата кои веќе страдаат од неисхранетост и болести, апелирајќи до меѓународната заедница итно да дејствува и да ги поддржи децата во Судан во овој критичен момент.

УНИЦЕФ потенцира дека Судан се соочува со најголемата хуманитарна криза и најголема криза на детско раселување во светот. Половина од 30 милиони луѓе на кои им е потребна помош се деца, а од околу 15 милиони лица раселени од почетокот на конфликтот, повеќе од половина се деца.

Агенцијата наведува дека „речиси секое трето дете е помладо од пет години“, додека околу 90 отсто од децата не посетуваат училиште.

Истовремено, гладот се шири, стапката на вакцинација опаѓа, а враќањето дома е опасно поради неексплодираната муниција и ограничениот пристап до основни услуги.

Според УНИЦЕФ, сериозните прекршувања на детските права - кои претходно беа ограничени главно на региони како Дарфур, Син Нил и Јужен Кордофан - сега се потврдени во повеќе од половина од 18-те судански држави.

Најчести злоупотреби се убиствата, киднапирањата и нападите врз училишта и болници, а најмногу случаи се регистрирани во Дарфур, Картум, Ал Џезира и Јужен Кордофан во изминатите две години.

УНИЦЕФ нагласува дека влошените услови, поттикнати од гладот и епидемиите, дополнително се усложнуваат со намалениот пристап до децата, поради сè поинтензивниот конфликт и ограничувањата што ги поставуваат владините власти или вооружените групи.

„Во 2024 година, повеќе од 60 отсто од нашите испораки на помош беа одложени поради исклучително нестабилната безбедносна состојба“, стои во извештајот.

Иако, како што наведува агенцијата, ниту една мисија не била откажана или прекината, честите одложувања сериозно го попречиле навременото доставување на помошта и пристапот до децата кои се во итна потреба.

Финансирањето за животоспасувачки услуги во Судан е на „критично ниско ниво“, предупредува УНИЦЕФ, посочувајќи дека за 2025 година имаат потреба од 1 милијарда долари за да ја продолжат својата мисија.

И покрај ограничените средства, УНИЦЕФ досега обезбедил психосоцијална поддршка, едукација и исхрана за милиони деца и семејства.

Извршната директорка Расел нагласи дека, иако Судан денес се соочува со најголемата хуманитарна криза во светот, меѓународната заедница му посветува премалку внимание.

„Не смееме да ги напуштиме децата на Судан. Имаме знаење и решеност да ја зголемиме нашата поддршка, но ни се потребни пристап и континуирано финансирање. Најмногу од сè, децата во Судан имаат потреба овој ужасен конфликт да заврши“, порача таа.