„Луѓето кои се на иста линија со ерменскиот премиер Пашинјан сакаат мир и нормализација на односите со Турција“

ЕРЕВАН (АА) - АЈШЕ САРИОГЛУ -

Директорот на Центарот за политички и стратегиски студии во Ерменија, доц. д-р Бенјамин Погосјан, рече дека јавното мислење во земјата е поделено на три групи и дека групата која е на иста линија со премиерот Никол Пашинјан е за изнаоѓање нови канали за дијалог со Турција, за мир и нормализација.

Погосјан, во разговор со Агенција Анадолија (АА) ги оцени односите меѓу Турција и Ерменија по Втората војна на Карабах.

Наведувајќи дека по Втората војна на Карабах, во ерменското општество преовладува понегативен пристап во однос на нормализацијата на односите со Турција, Погосјан рече дека во земјата перцепцијата за Турција може да се подели на три групи:

„Постои група која никогаш не ја поздравува нормализацијата со Турција и која ја гледа Турција како непријател поради неодамнешната војна надвор од историските прашања. Втората група, и покрај тоа што Турција ја гледа како непријател поради нејзината поддршка на Азербејџан, го брани ставот дека е потребно да се воспостави директен дијалог, а не преку посредници. Третата група ја претставуват оние што се на иста линија со премиерот Никол Пашинјан. Тие, оставајќи го зад себе ставот на Турција во војната во Карабах, сакаат мир и нормализација, користење нови канали за дијалог и разумен јазик.“

„Можеме да кажеме дека ерменската Влада сака нормализација со Турција, најмалку таа има мотиви да го започне процесот“, рече Погосјан.

Наведувајќи дека најпроблематично прашање е коридорот „Зангезур“, кој ќе обезбеди физичко поврзување на Азербејџан со регионот Нахчиван, Погосјан предложи да се користи поинаков термин како што е терминот „транзитна зона“ наместо зборот „коридор“.

Погосјан истакна дека формулата „коридор“, која ќе воспостави директна врска без да биде предмет на надзор, нема да биде прифатена од ниту една страна во Ерменија.

-„Ставот на Иран е изненадувачки“ -

Меѓу другото, Погосјан нагласи дека Ерменија е зачудена од ставот на Иран во Втората војна на Карабах.

„Ставот на Иран изненади многумина во земјата. Имаше очекување дека Иран ќе дејствува за да го заштити статус квото во регионот. Затоа, се сметаше дека Иран ќе дејствува за да ги заштити своите граници со Карабах. Иако изјавата ‘Му честитам на Азербејџан, кој ги ослободи земјите на Карабах‘ на врховниот водач Али Хамнеи беше разочарувачка за јавноста, статусот на партнер не е променет.“

- „Ерменија сега е повеќе зависна од Русија“ -

Погосјан нагласи дека Ерменија, по војната со Азербејџан која стивна со интервенцијата на Русија, станала позависна од Русија.

Во врска со повоената ситуација, Погосјан вели: „Русија сега се здоби со посилна позиција во земјата. Ерменија исто така е повеќе зависна од Русија отколку што беше од 1991 година до војната.“

Тој за стратегијата на московската администрација, рече: „Русија беше во позиција да ја запре војната, но не го стори тоа бидејќи нејзин интерес беше да ја зголеми својата воена моќ во Карабах. Русија на Ерменија ѝ рече: ‘Ако не го прифатите планот на Лавров, ќе го прифатите со војна‘. Не ги спречија Турција и Азербејџан затоа што тоа ќе резултираше со прифаќање на планот на Лавров од страна на Ерменија. Така и се случи.“

– Изјава од претседателот Ердоган за „Зенгезур“ -

Турскиот претседател Реџеп Таип Ердоган во емисија на турската државна радио телевизија (ТРТ), во врска со средбата одржана минатиот петок меѓу рускиот претседател Владимир Путин, азербејџанскиот претседател Илхам Алиев и Пашинјан, рече:

„Мојот брат, Илхам Алиев, ме информира дека оваа средба била многу добра и продуктивна. Благодарение на оваа средба, решени се прашањата за железницата и автопатот кој е во изградба покрај реката Арас. Следниот чекор што треба да се направи тука е и прашањето за автопатот што ќе стигне до Игдир. Со автопатот особено ќе се надмине проблемот со Нахчиван, од друга страна, ќе биде направен успешен чекор за Азербејџан да се поврзе со Игдир, со тоа што ќе поминува низ територијата на Ерменија. Дополнително, ќе се направи важен чекор во транспортот на луѓе и стока, по копнен пат и со железница.“